Alqi Bllako nuk është arratisur apo fshehur gjëkundi. Deputeti për të cilin SPAK kërkoi arrestimin për çështjen e Inceneratorëve, ndodhet në Polici, i vetëshkuar atje, ashtu siç e vetëdorëzoi mandatin e deputetit, pa qenë nevoja që t’i hiqej.
Në një njoftim zyrtar nga Policia e Shtetit, thuhet se “Drejtoria e Përgjithshme e Policisë së Shtetit, informon publikun se përkundër disa lajmeve të rreme mbi arratisjen e shtetasit Alqi Bllako, ky shtetas ndodhet në Drejtorinë Vendore të Policisë Tiranë që prej mbrëmjes së djeshme. Sqarojmë se shtetasi Alqi Bllako është vetëdorëzuar konform detyrimit ligjor për zbatimin e masës së sigurisë ‘Arrest në burg’, lëshuar dje nga Gjykata e Posaçme e Shkallës së Parë për Korrupsionin dhe Krimin e Organizuar”.
Alqi Bllako, një ish-zyrtar i LSI kaluar me PS-në, ka qenë një ndër njerëzit me rol firmëvënieje te Incenaratorët, pasi mbante postin e Sekretarit të Përgjithshëm të Ministrisë së Mjedisit në kohën kur ky dikaster drejtohet nga Lefter Koka, sot pas hekurave. Pra bëhet fjalë për mandatin e parë të qeverisjes së PS-së, kur ishte në koalicion me LSI-në. /tesheshi.com/
