Britanikja The Times lajmëronte se dy herë kampioni i botës, Fernando Alonso, mund të tërhiqej para nisjes së sezonit të garave nëse makina e tij, McLaren MP4-31, nuk e bindte atë. The Times pretendonte se Alonso mund të vendoste brenda pak orësh të tërhiqej po qe se nuk do të mbetej i kënaqur me makinën e ofruar atij nga skuadra Mclaren-Honda për të garuar në kampionatin që nis nga fundi i marsit.
Alonso thuhet të ketë kërkuar një përmirësim të madh në makinën që ai do të pilotojë për t’u bindur që të qëndrojë. Nëse e gjykonte se makina nuk mund të garojë në nivelin për të fituar titullin, spanjolli, gjithnjë duke iu referuar burimit të mësipërm, ka paralajmëruar se mund ta lërë McLaren-in dhe Formula 1-shin.
Përndryshe, Alonso është shfaqur krejt ndryshe, duke i hedhur poshtë spekulimet për tërheqje të menjëhershme nga garat e shpejtësisë.
“Po, kam lexuar diçka. Jam tërësisht i tronditur!”
Ndërsa ka bërë dje më tepër xhiro në prova se në tërë parasezonin e vjetshëm, ai është shprehur i kënaqur nga situata aktuale. “Kanë qenë një provë vërtet pozitive. Jam shumë i lumtur me mënyrën si ka shkuar dita, dhe ne kemi konfirmuar të gjithë punën e bërë në fabrikë mbi besueshmërinë, e cila po jep fryte.”
Sezoni i vitit të shkuar qe katastrofik për Alonson dhe për bashkëpunimin e saponisur mes McLaren-it dhe Honda-s, por spanjolli dhe shoku i tij i skuadrës, britaniku Button, shpresojnë të kenë një makinë shumë më konkurruese këtë vit. /tesheshi.com/
