Presidenti turk Erdogan ka biseduar me homologun e tij ukrainas Volodymyr Zelensky për ngjarjet aktuale në luftën mes Rusisë dhe Ukrainës.
Drejtoria e Komunikimeve në zyrën e presidentit turk tha se Erdogan në një bisedë telefonike me Zelensky-n ka thënë se vazhdimi i luftës në Ukrainë nuk është në favor të askujt dhe se qëllimi është të arrihet një armëpushim i përhershëm sa më shpejt të jetë e mundur.
Në deklaratë thuhet se Erdogan tha se Turqia po bën përpjekje intensive diplomatike për të ndërtuar paqen midis Rusisë dhe Ukrainës.
Presidenti turk Erdogan njoftoi gjithashtu se do të vazhdojë të bëjë përpjekje për të organizuar një takim të drejtpërdrejtë dhe negociata midis presidentit rus Vladimir Putin dhe homologut të tij ukrainas Zelensky.
Duke theksuar se Turqia vazhdon të dërgojë ndihma humanitare për popullin ukrainas dhe ukrainasit në mërgim, Erdogan tha se ishte me rëndësi të madhe që korridoret humanitare të mbeten të kalueshme dhe të sigurta. /tesheshi.com/
