Massimiliano Allegri, trajneri aktual i Juventusit, ka hequr çdo dyshim mbi të ardhmen e tij të afërt kur ka deklaruar qartas se vitin e ardhshëm do të jetë përsëri drejtuesi teknik i skuadrës torineze.
“Vitin tjetër do të jem përsëri trajner i Juventusit, sepse kam ende një vit tjetër në kontratën time.”
Emri i tij është lakuar fort muajt e fundit për një kalim në kampionatin anglez apo spanjoll, ku janë përmendur si skuadra të mundshme për t’u drejtuar prej tij Çelsi dhe Reali i Madridit. Te Çelsi, ndërkohë, me shumë mundësi do të shkojë një tjetër teknik italian, Antonio Conte, kurse te Reali nuk ka shumë që gjërat i ka marrë në dorë Zinedine Zidane.
“Jam në rregull këtu,” ka thënë ai duke iu referuar Juventusit, “dhe nuk ka probleme.” “Po i afrohemi fundit të sezonit në përpjekje për të fituar Scudetto-n dhe Kupën e Italisë, e të shohim se çfarë do të ngjasë në Champions League.”
Allegri i bëri komentet pasi u shpall trajneri më i mirë i vitit në Itali dhe fitoi çmimin “Stoli i Artë”. /tesheshi.com/
