Afrimi i Sam Allardyce-it si trajner i ekipit kombëtar anglez u duk që në korrik si një zgjedhje e detyruar nga mungesa e alternativave më bindëse, por duket se shpejt rrugët do të ndahen.
Skandali i plasur me Allardyce-in, që pretendohet ta ketë shfrytëzuar pozicionin për të negociuar një marrëveshje 400.000 paundëshe e të ketë dhënë këshilla për mënyrën e shmangies së rregullave të transferimit të lojtarëve, e ka bërë të afërt shkarkimin e tij.
Britanikja The Times lajmëron për një takim të drejtuesve të futbollit anglez në orët e para të ditës së sotme. Vendimi nuk do të merret para një bisede kokë më kokë me Allardyce-in, por fati i ish-trajnerit të Sandërlendit duket të jetë i shkruar.
Sam Allardyce e drejtoi Anglinë vetëm në një takim, në atë të fillim të shtatorit ndaj Sllovakisë. Një ndeshje e luajtur në transfertë, dhe e fituar 0-1 vetëm në minutën e 95-të, me një gol të Lallana-së.
Eurosport rendit një sërë emrash që mund ta zëvendësojnë Allardyce-in.
I pari në listë është Steve Bruce, që u intervistua në verë, duke e humbur asokohe garën me trajnerin aktual. Bruce mendohet të jetë kandidatura kryesore.
Vijnë më pas Alan Pardew, Eddie Howe Gareth Southgate, Glenn Hoddle e Gary Neville. /tesheshi.com/
