Beleri ka ofruar alibinë më të çmendur për akuzën se ai ka qenë në komandon vorioepiriote greke, e cila shkaktoi masakrën e Peshkëpisë në prill të 94-ës në tokën shqiptare, me sulmin ndaj një poste kufitare dhe vrasjen aty të dy oficerëve shqiptarë.
“Unë isha 22 vjeç në atë kohë”, ka thënë ai në një interviste, duke e përdorur moshën në këtë rast si alibi, a thua se kur njeriu është 22 vjeç ekziston rregulli që nuk kryen dot krimin e vrasjes.
“Çështja ka kaluar nëpër të gjitha nivelet e sistemit të drejtësisë greke dhe është gjykuar tre herë të tjera në Shqipëri, dhe unë jam shfajësuar në secilin prej këtyre proceseve. Nuk e di se çfarë lloj kulture juridike na lejon të vazhdojmë t’i referohemi një incidenti të vitit 1995, kur ka kaluar një karrierë prej 30 vitesh”, arsyeton ai mbrapshtërisht, ku në rreshta tradhëton veten, duke u mbrojtur me verdiktet gjyqësore dhe vitet nga ajo ngjarje.
Kur njeriu akuzohet padrejtësisht për një vrasje, janë të tjera fjalë dhe të tjera argumenta ato që mund dhe duhet të thuhen.
Po ashtu, Beleri pretendon se shqiptarët janë nacionalistë. Po pse jo dhe grekët, nëse e marrin për të mirëqenë atë që thotë ai?!
“Unë besoj se zoti Rama ka investuar në të gjithë këtë aferë për t’u treguar nacionalistëve shqiptarë se ka mbajtur një linjë të vendosur me Greqinë dhe nuk do të frikësohet nga askush. Nacionalizmi ‘shitet’ mirë në Shqipëri”, ka thënë ai. Por ndërkohë, kur është fjala për Greqinë, është pikërisht nacionalizimi grek ai që të vjen në mendje, si sëmundje shoqërore, më shumë se çdo gjë tjetër.
Beleri gjithashtu merr dhe një pozitë atërore ndaj shqiptarëve, kur pretendon t’i ndihmojë ata që të integrohen në Europë, meqënëse tashmë është dhe eurodeputet. “…Mund t’i ndihmoj shqiptarët të bëhen anëtarë të plotë të familjes evropiane”, ka thënë nën delir ky njeri, i cili ndryshe njihet vetëm për ushtrimin e zanatit të hidraulikut në jetë.
Por tashmë ai është një eurodeputet, gjë që mund të shërbejë si ngushëllim për opionionin shqiptarë që sheh të futen në parlament lloj-lloj mostrash krimi. Ja që dhe Parlamenti Europian nuk është më mirë! /tesheshi.com/
