“Nuk ka vend për Ali Ahmetin në Kumanovë”, ky ka qenë mesazhi i banorëve të Karadakut të cilët në shenjë proteste kundër politikave të Bashkimit Demokratik për Integrim kanë bllokuar të gjitha rrugët që shpien në drejtim të restorantit “Royal Palace” në fshatin Çerkez të Kumanovës, aty pra ku në ora 15:00 planifikohej të mbahet tubimi i rradhës së BDI-së, në krye me Ali Ahmetin.
Me t’u njoftuar se kreu i BDI-së do të zbresë në Kumanovë për ta shpalosur platformën e partisë së tij për zgjedhjet e pritshme që do të mbahen me 11 dhjetor të këtij viti, familja e të ndjerit “Komandant Shqiponja” i cili u vra në pabesi nga pjesëtar i partisë shqiptare në pushtet ka bërë thirrje publike që “në asnjë mënyrë të mos lejohen tradhëtarët e kombit të futen në këtë qytet legjendar”.
Kështu, protestuesit e revoltuar kundër liderit të BDI-së kanë sulmuar me gurë veturat e funksionarëve të partisë, të cilët nga pamundësia për të hyrë në qytet në rrugët normale, depërtuan në restorant përmes një rruge anësore e fushës së fshatit Çerkez.
Tubimi i BDI-së që duhej të mbahet në ora 15:00 u shty për në orën 17:00. Nga fotot që qarkullojnë në rrjetet sociale facebook shihet një prezencë e ulët e pjesëmarrësve në këtë tubim, edhe pse më parë Kumanova shquhej si bastion i BDI-së, ku nga 5 deputetët e mundshëm shqiptarë, 4 i takonin kësaj partie.
Kujtojmë se rajoni i Karadakut, pjesë e së cilës përbën edhe Kumanova, është vendi ku kryesisht është zhvilluar lufta në vitin 2001 ndërmjet forcave maqedonase dhe Ushtrisë Çlirimtare të Kosovës. Nga kjo luftë kanë humbur jetën me dhjetëra kumanovarë, por siç thotë populli, dyfish më shumë janë vrarë pas luftës nga vet Ali Ahmeti, gjegjësisht me urdhërat e tij.
Në mesin e të vrarëve pas luftës së 2001-it janë ushtarët më të mirë që ka njohur UÇK-ja, si Ridvan Neziri, Harun Aliu, Komandant Shqiponja, Komandant Teli dhe të tjerë.
Mensur Krasniqi – /tesheshi.com/
