Në një intervistë për “Kathimerini”-n, kreu i BDI-së Ali Ahmeti, tashmë në aleancë qeverisëse me Zaevin e LSDM-së, ka sqaruar të vërtetën sipas tij të Platformës së Tiranës, sulmuar aq ashpër nga disa qarqe politike maqedonase, përfshirë dhe ish-aleatin e tij Gruevski. Megjithatë, në shpjegimet e tij ai i referohet vetëm presidentit Ivanov.
“Ajo ishte në përputhje me kushtetutën e Republikës së Maqedonisë, programet e gjithë partive dhe Marrëveshjen e Ohrit. Presidenti Ivanov e quajti “platformë” dhe jo unë.
“Si mund të flasim për platformë të “Shqipërisë së Madhe”, kur ne u referohemi marrëdhënieve të fqinjësisë së mirë, kërkojmë të zgjidhet kontesti i emrit, anëtarësimi në NATO dhe në BE. Kërkojmë pjesëmarrjen e shqiptarëve si faktor bazik në diskutimet për zgjidhjen e kontestit të emrit, zbatimin e plotë të Marrëveshjes së Ohrit dhe marrëdhënie të mira ndëretnike”, ka theksuar Ahmeti.
Më tej, politikani i njohur shqiptar i ka bërë me dije gazetës greke se nuk ekizston kurrfarë ideje për “Shqipëri të Madhe”, porse shqiptarët sipas tij kanë plot arsye të kërkojnë të drejta të mohuara.
“Çfarë kërkojmë ne? Kërkojmë zbatimin e Marrëveshjes së Ohrit, me qëllim që shqiptarët të mos jemi këtu si “qeraxhinj”, por autoktonë në vatrat tona. Kërkojmë gjithashtu që Kosova të njihet si shtet dhe Shqipëria të ketë stabilitet dhe paqe. Këto tre vende, Kosova, Shqipëria, Maqedonia, të jemi të tre në NATO. Kërkojmë që Greqia, Shqipëria, Maqedonia, Kosova, Bullgaria, të jenë në një Europë të madhe, që shtrihet nga Athina deri në Stokholm”, është shprehur kreu i BDI-së. /tesheshi.com/
