Nga Mensur Krasniqi
Kreu i partisë shqiptare në pushtet në Maqedoni, BDI-së, Ali Ahmeti në një nga fjalimet e tij ka shtruar pyetje publike se ku ka gabuar deri tani gjatë qeverisjes së tij? Kësaj pyetjeje, siç kujton portali tesheshi, më së miri, muaj më parë i është përgjigjur ish-deputetja e BDI-së, Ermira Mehmeti.
Kjo zonjë, para se të tërhiqet plotësisht nga kjo parti ishte zëri më kritik brenda saj. Këto kritika aspak dhe asnjëherë nuk ishin të mirëpritura nga kryesia qendrore, ndonëse gjithmonë në BDI pretendohet se janë liberalë dhe pranojnë çfarëdoqoftë mendimi ndryshe nga qëndrimet zyrtare të partisë.
Në vazhdim ua përcjellim statusin e plotë të publikuar muaj më parë në rrjetin social facebook të Ermira Mehmetit, me ç’rast ajo në mënyrë taksative ka numëruar të gjitha vërejtjet dhe gabimet e ish-partisë së saj. Thuhet “ish” ngaqë ajo me muaj të tëra nuk është paraqitur në asnjë tubim të BDI-së, dhe se për herë të parë nuk figuron në listat e deputetëve për zgjedhjet e parakohshme parlamentare që pritet të mbahen më 11 dhjetor të këtij viti.
Statusi Ermira Mehmetit:
“Unë kam votuar për këtë qeveri sepse kam besuar se:
-do të anëtarësohemi në NATO
-do të nisim negociatat për EU
-do të realizojmë premtimet për barazi të plotë
-do të rrikthejmë vlerat e demokracisë
-do të rivendosim sigurinë
Por, gjatë gjithë kësaj kohe, Qeveria:
-e izoloi vendin nga partnerët ndërkombëtarë
-e rrënoi imazhin pozitiv të vendit
-nuk tregoi asnjë respekt për parimet e bashkëqeverisjes etnike
-pa ndalur e refuzoi realizimin e Marrëveshjes së Ohrit
-vendosi autoritarizmin në vend të demokracisë
-refuzoi dialogun
-rrënoi bashkëjetesën
-prishi kohezionin e brendshëm
Mjaft ishte. As qytetarët dhe as komuniteti ndërkombëtar nuk mbështet qeverisjen jodemokratike. Është koha për dorëheqje.”, ka shkruar Ermira Mehmeti para disa muajsh.
Nga ana tjetër, Ermira Mehmeti ishte njëra ndër politikanet më të përgjuara shqiptare sipas “bombave” të shpalosura nga lideri i opozitës maqedonase, Zoran Zaev. Në bazë të atyre bisedave telefonike që Zaev i publikoi ishte edhe i ashtëquajturi skandal erotik mes saj dhe ish-zëvendëskryeministrit për implementimin e Marrëveshjes së Ohrit, Musa Xhaferi, për të cilat sipas Mehmetit në një intervistë për portalin tesheshi muaj më parë thuhet të jenë biseda të montuara. /tesheshi.com/
