Pas takimit dhe me kreun e BDI-së, Ali Ahmeti, pasi takoi dy ditë më parë dhe tre krerë të tjerë politikë shqiptarë, kryeministri Rama kë kërkuar unifikimin e faktorit shqiptar në Maqedoni në funksion të zbatimit të plotë të Marrëveshjes së Ohrit. Kjo u bë me dije nga vetë Zyra e Shtypit e kreut të qeverisë shqiptare. Këtë, Rama ua ka kërkuar të gjithëve, pavarësisht kush do të jetë në qeveri.
Ndërkaq, pas takimit me Ramën, Ali Ahmeti ka bërë me dije kushtet, sipas tij të panegociueshme, që BDI do vendosë, edhe pse nuk e tha, ndaj aletatit të tij Gruevski.
“Marrëveshja e Ohrit, anëtarësimi i vendit në NATO dhe në Bashkimin Europian, zhvillimi ekonomik i barabartë midis komuniteteve, këto do të jenë parimet mbi të cilat ne do të zhvillojmë negociatat në të ardhmen”.
Ndërsa sa i përket fenomenit të rrjedhjes së votave shqiptare drejt LSDM-së maqedonase, 70 mijë të tilla, kreu i BDI-së.
“Unë e shoh si një çështje krejtësisht tjetër, këtë tendencë të një partie politike maqedonase, cilado qoftë ajo, dhe më frikëson, pavarësisht se nuk kam argumente, për të dëmtuar në mënyrë të sofistikuar thelbin e Marrëveshjes së Ohrit, e për t’u justifikuar nesër përpara shqiptarëve se edhe LSDM-ja e ka shqiptarin brenda partisë, që mbron legjitimitetin e komunitetit shqiptar. Gjithnjë nëse nuk është djallëzore nuk ka ndonjë shqetësim për BDI-në”, tha Ahmeti. /tesheshi.com/
