Më parë kishte qëndrim të prerë se zgjedhjet e parakohshme parlamentare do të mbahen konform Marrëveshjes së Përzhinos më datë 24 prill, ndërsa sot kryetari i Bashkimit Demokratik për Integrim, Ali Ahmeti në një takim me zv/presidentin e IRI-t Tomas Garet dhe me drejtorin e këtij instituti për Evropën Jan Surocak, mbajti një qëndrim më të butë rreth kësaj çështje.
Ai deklaroi që data e zgjedhjeve të parakohshme parlamentare mund të shtyhet vetëm nëse arrihet një marrëveshje e re politike.
“Për t’u ndërruar data, sigurisht që duhet përsëri një vendim konsensual i të gjitha partive politike në vend. Ne kemi dhënë arsyet tona se pse nuk duhet të bisedohet edhe njëherë marrëveshja e arritur më 2 Qershor dhe 15 Korrik. Ne duam që sa më shpejt t’i jepet fund kësaj amullie, këtij ngërçi politik që ka përfshirë vendin. Nëse ka pasur deri më tani zgjedhje të kontrolluara, zgjedhje më të kontrolluara në vend do të jenë këto tani, prej institucioneve ndërkombëtare dhe prej forcave politike në vend”, tha Ali Ahmeti, kryetar i BDI-së.
Ahmeti gjithashtu shtoi se BDI do të angazhohet në maksimum në mbylljen e dy çështjeve të pazgjidhura, pastrimi i listës zgjedhore dhe pavarësia e mediave. /tesheshi.com/
