Kreu i BDI-së, Ali Ahmeti u shpall “Qytetar Nderi” i Tiranës, një titull që iu akordua në shenjë falënderimi për gjithë kontributin e tij në komunitetin shqiptar të Maqedonisë së Veriut.
Në ceremoninë e organizuar në sallën e Këshillit Bashkiak të Tiranës ishte, pos kryeministrit Rama, edhe ish-presidentët Alfred Moisiu, Bamir Topi.
Rama thekson se Ali Ahmeti është një prej figurave më të rëndësishme në skenën politike dhe shoqërore të Ballkanit Perëndimor ku me punën e tij ka lartësuar shqiptarët në sytë e gjithë botës. Madje për kryeministrin, ai është “mjeshtër në diplomaci”.
“Është ende herët për tu shkruar historia e ktij shqiptari, ndër më të mirët, por nuk është aspak herët të thuhet se ndër shqiptarët e kësaj kohe ndryshimesh epokale për kombin tonë, ndër të cilat shkëlqen ndryshimi rrënjësor i shqiptarëve në Maqedoninë e Veriut, Ali Ahmeti është mjeshtri ynë më i madh në përdorimin e armës së diplomacisë. Pa Ali Ahmetin shqiptarët e Maqedonisë së Veriut nuk do ishin në ditën më të mirë në historinë e atij shteti.
Edhe pse ai nuk është ulur kurrë në një karrige zyre veç atij kolltuku të vjetër të selisë së partisë së tij, s’ka dyshim se i takojë atij në radhë të parë sulmet dhe kritikat e partisë së shqiptarëve që ai udhëheq. Historia do e thotë me zë edhe më të forë se sot:
Atë që ka bërë Ali Ahmeti me pushtetin për përparimin shqiptarëve dhe të drejtave të shqiptarëve në shtetin fqinj dhe për ngritjen lart të shqiptarëve në sytë e botës, të gjithë ne të tjerët nuk mund të diskutojmë dhe duhet ta marrim si mësim.”
Ndërsa Ahmeti tha se “këtë nder të sotëm e ndaj me të gjithë patriotët e burgosur politikë në shtetin tim e Kosovë, me tre mijë mbetje mortore në vendlindjen time, se ata për atë flamur dhe gjuhë janë vrarë. Më keni nderuar me këtë titull”.
Për politikanin nr. 1 të shqiptarëve në Maqedoni, kauza e tij mbetet bashkimi kombëtar.
“E kam thënë botërisht, që kur e kemi nisur veprimtarinë për bashkimin e tokave shqiptare, nuk kam asnjë rezervë, se ka edhe nga ata që thonë se e kemi nisur për demokraci, ne e kemi nisur për bashkimin e tokave shqiptare”. /tesheshi.com/
