Ose qeveri e një koalicioni të gjerë; ose qëndrim në opozitë; ose përsëritje të zgjedhjeve – këto janë tre opsionet me të cilat BDI po i qaset bisedimeve me dy partitë kryesore maqedonase, VMRO dhe LSDM, në përpjekje për t’i dhënë një zgjidhje situatës më të re politike të krijuar pas zgjedhjeve të 11 dhjetorit, e cila është në një ngërç shtesë, pasi fituesi aritmetik, VMRO nuk arrin dot që të krijojë një qeveri të qëndrueshme, edhe më ndihmën e aleatit shqiptar BDI.
Këto opsione, kreu i kësaj partie, Ali Ahmeti ia bëri me dije ambasadores gjermane në Shkup, Kristinë Althauser, gjatë një takimi mes tyre, ku në qendër të diskutimeve ishte pikërisht gjendja në vend dhe prospektet e krijimit të qeverisë së re pas zgjedhjeve.
Ahmeti theksoi nevojën e përkrahjes gjermane për zhvillimet e mëtejshme politike; ndërsa theksoi se gjuha shqipe, reformat sistemore dhe integrimi në NATO dhe BE mbeten prioritete absolute dhe të panegociueshme për BDI-në. M.Krasniqi – /tesheshi.com/
