Një prej anëtarëve të parë të rezistencës ndaj sundimit kolonial francez në vitet 1950, Ajet Ahmedi, ka ndërruar jetë në Zvicër në moshën 89 vjeç. Ai do të ishte një prej nismëtarëve të luftës për pavarësi, që do të kishte si fund shpalljen e mëvetësisë së Algjerisë më 1962.
Zyra e shtypit e presidencës algjeriane ka njoftuar për tetë ditë zie kombëtare për vdekjen e Ahmedit, “Presidenti Abdulaziz Buteflika ka shpallur nga e premtja tetë ditë zie kombëtare pas vdekjes së Ajet Ahmedit.”
Në një mesazh ngushëllues për familjen dhe të afërmit e të ndjerit, presidenti Buteflika do të nënvizonte, “…na ka lënë një nga figurat e mëdha të Algjerisë, një aktivist i spikatur dhe një udhëheqës historik i pashoq…”
Një prej drejtuesve të rezistencës, Ajet Ahmedi do të kapej në vitin 1956 nga forcat franceze, për t’u burgosur për gjashtë vite, deri në 1962-shin, kur edhe u lirua. Në kërkim të më shumë pluralizmi politik, ai do të ndante rrugët pas pavarësisë me qeverinë e re, për të krijuar në vitin 1963 Partinë e Frontit të Forcave Socialiste.
Në të njëjtin vit do të arrestohej, për t’u arratisur në 1966-ën e për të mbërritur në Zvicër, ku edhe e vazhdoi opozitarizmin e tij ndaj pushtetit në Algjeri. Ai do kthehej përsëri në vendin e tij në vitin 1989, dhe do të largohej rishtas tre vite më pas. Ajet Ahmedi do të shpallte kandidaturën për president i Algjerisë në vitin 1999, për t’u tërhequr pak para zgjedhjeve.
Në kongresin e pestë të partisë së tij në vitin 2013, ai do ta linte postin e drejtuesit të saj, e po ashtu do të tërhiqej nga jeta politike. Ajet Ahmedi ndërroi jetë në Lozanë. /tesheshi.com/
