Gazetari Alfred Peza, ish-deputet i Partisë Socialiste, që së fundmi u përfshi në një proces hetimor për fshehje të pasurisë, është rikthyer në skenën publike si shkrimtar.
Libri i tij letrar por bazuar mbi një figurë historike si, Sarah Blloshmi, u promovua sot nga MapoEdition.
Peza suprizoi që në nisje të fjalës së tij kur iu drejtua të pranishmëve, shumica kolegë të tij gazetarë; “Sa shumë qenkeni, mos thoni pastaj ku i gjen lekët Fredi?”. Pas humorit ai lajmëroi projektin e tij të madh si shkrimtar në zhanrin e monografive, ku më parë ka shkëlqyer me shitje rekord një tjetër koleg i tij, gazetari Blendi Fevziu.
“Ky libër është pjesë e një projekti psikologjik, ku pas Ahmet Zogut do të pasohet besoj vitin e ardhshëm me një libër për Enver Hoxhën, dhe më pas për një lider shqiptar të pas ’90, të epokës së pluralizmit, sepse në këtë mënyrë, unë dua që nëpërmjet tre personazheve politikë më të rëndësishëm ose jo, të historisë së Shqipërisë, të shpjegoj sipas meje historinë e vendit tonë”, u shpreh Peza sot gjatë promovimit të librit në UET.
Ndërsa për librin e sapobotuar “Sarah” ai tha se “faktikisht është një libër tipik, me një personazh atipik, i shkruar në një kohë atipike. Dhe atipizmi është ajo që e bën këtë libër të ketë këtë interes”.
Ky libër i ka kushtuar pesë vite punë kërkimore nëpër arkiva, hulumtime, hapje dosjesh pothuaj 100-vjeçare për të rënë në gjurmët e historisë së rrallë të gruas më të mistershme e të përfolur, Sara Blloshmit, e cila ka jetuar në kapërcyell të Luftës së Dytë Botërore në Tiranë.
Dy personazhe të këtij libri janë realë: Sara Blloshmi dhe Ahmet Zogu, të cilët siç besohet kanë pasur një histori dashurie mes tyre.
“Bëhet fjalë për Shqipërinë mes dy luftërave botërore. Personazhet kryesorë janë Ahmet Zogu, kryeministri-President dhe më pas Mbret i Shqipërisë dhe Sarah, bashkëshortja e Selahudin Blloshmit, deputetit të Parlamentit të Shqipërisë dhe mbesa e Ismail Qemalit. Rreth tyre ka edhe shumë personazhe të tjerë realë ose të trilluar. Libri Ka brenda tij intrigën e pashembullt të pushtetit, pasionin e fshehtë përvëlues dhe enigmën e madhe të një vrasjeje. “Eshtë një libër emancipimi, për gra të lira dhe burra të vërtetë”, është shprehur vetë Peza në një intervistë tek Mapo për librin.
Nuk dihet si mund ta presë Fevziu këtë hyrje të re në fushën ku ai ka ngjallur aq shumë kuriozitet dhe ka shënuar rekorde shitjes (sipas UET-Press) me monografinë mbi Zogun dhe Hoxhën disa vite më parë. /tesheshi.com/
