Kush i ka ndjekur garat e Formulës 1 në dhjetëvjeçarin e fundit të shekullit të shkuar, nuk mund ta ketë harruar italianin Alex Zanardi, pilotin që garoi me makina të ndryshme në kohë të ndryshme, nga viti 1991 në 1999-tën.
Për ironi të fatit, vetëm një ditë para pesëmbëdhjetëvjetorit të aksidentit fatal në Gjermani, ku ai i humbi të dyja këmbët, Zanardi ka fituar një medalje të artë në Lojërat Paralimpike të Rios.
I pamposhtur, kurrë i shkurajuar, Alex Zanardi nuk ka hequr dorë nga garat. Edhe pse pa këmbë,
ai garon tani në një disiplinë të veçantë, në atë të garave çiklistike me anë të duarve.
Ai ka marrë pjesë dhe në Lojërat e Londrës, ku ka fituar dy medalje të tjera të arta.
Zanardi do të pilotonte një makinë shpejtësie në 41 gara të Formulës 1 në vitet ’90. Për të kaluar më pas në një disiplinë tjetër të garave të shpejtësisë.
Më 15 shtator të vitit 2001, ai pëson një aksident të rëndë në një garë në Gjermani, ku humbet dhe të dy këmbët.
Më pas, Zanardi, një pilot mjaft impulsiv dhe i talentuar, iu kthye sërish garave, por tani ndryshe, duke luftuar me duar, e jo me këmbë. /tesheshi.com/
