Disa media online kanë publikuar një foto të hershme të Aleksandër Frangajt, presidentit të TV Klan, një prej njerëzve më të fuqishëm të medias, me diçiturën: “kur lidhte këpucët me spango”, një shprehje kjo e Spartak Ngjelës pikërisht për këtë rast.
Në fakt, dalja prej një sistemi si ai komunist, ku varfëria materiale e shpirtërore i shndërronte njerëzit në hipokritë deri dhe qesharakë, ka “viktimizuar” shumë prej nesh në raport me të kaluarën.
Por Frangaj ka dhe një histori mjaft interesante nga e kaluara, që vite më parë rrëfehej me zell të madh nga një emër tjetër i njohur i gazetarisë, mik i Frangajt, si dhe drejtues në vite i disa mediave në pronësi të tij.
Dihet që para 90-ës, të jetoje në provincë dhe të kishe rrugë për Tiranë ishte ngjarje në jetën e individit. Më pas kjo përbënte dhe ngjarje në jetën e komunitetit, nëse individi kish lënë një gjurmë të dukshme për diçka gjatë asaj rruge Tirane.
Dhe kështu ka ndodhur dhe me Sandrin, sipas rrëfimit të mikut të tij. Ai ka patur një rrugë për Tiranë dhe pas kthimit në Lezhë, ka nisur të promovojë veten si njeriu që ka arritur të takojë Tefta Radin.
Në atë kohë i vetmi ekran ishte ai i TVSH-së dhe çdo person që dilte aty, ishte dhe pak VIP për kohën. Dhe përjashtim nuk bënte as znj. Tefta Radi, folëse e njohur e lajmeve.
Dhe sot, thotë rrëfyesi i ngjarjes së Sandrit me Teftën, po t`ja përmendësh atij këtë episod rrudhet dhe e emërton veten me një epitet përçmues që ka përmbajtje erotike, karakteristikë e fjalorit të tij të përditshëm. /tesheshi.com/
