Komisioni Qendror i Zgjedhjeve sot ka marrë vendim për regjistrimin e partisë së re me emrin Partia e kosovarëve serbë (PKS) me në krye Aleksandar Jabllanoviq.
Anëtarët e KQZ-së e kanë përshëndetur themelimin e këtij subjekti politik që përfaqëson serbë të Kosovës në bazë të ligjeve vendore duke shtuar se nëse në ndonjërin nga aktet e kësaj partie ka gabime, do t’i jepet afat për korrigjim të tyre.
Anëtari i KQZ-së nga PDK, Betim Gjoshi, tha se është mirë që kjo parti ka respektuar rekomandimet e KQZ-së dhe e ka ndërruar emrin dhe ka ndryshuar logon.
“Mbi të gjitha çka më vjen mirë, unë kam parë zotimet e saj brenda statutit që ai do të njehë rregullat dhe ligjet e Republikës së Kosovës që kjo është me shumë rëndësi, edhe për integrimin e kësaj pjese të komunitetit në Kosovë”, tha ai.
Miradije Mavriqi, drejtoreshë ekzekutive për regjistrimin e partive politike dhe certifikim, tha se me nenet e legjislacionit që kanë nuk kanë parë ndonjë gjë që do të ishte në kundërshtim me këto nene.
“Me nenet e legjislacionit që i kemi zyra nuk ka parë ndonjë prioritet që do të kishte me ndodh, ose diçka si emër i veçantë, sepse nuk është irritues, nuk përfaqëson emri që kish me simbolizua kundër ndonjë partie tjetër apo individi. Kështu që zyra është bazuar në këto nene të atij ligji”, tha ajo.
Kujtojmë se Aleksandar Jabllanoviq, pretendoi së fundmi kreun e Listës Serbe, për çka ndodhi dhe një përplasje në Kuvend mes deputetëve të kësaj partie, por ndërhyrja e Beogradit doli të jetë përcaktuese, duke konfirmuar përkrahjen për Slavko Simiç si kreytar të partisë. /tesheshi.com/
