Lista e Shpresës, koalicioni i reformistëve dhe i të moderuarve, që janë në krah të presidentit Hasan Ruhani, kanë fituar në raundin e dytë të zgjedhjeve parlamentare në Iran.
Nga 68 vendet në parlament për të cilat është votuar të premten, 33 janë fituar nga lista e koalicionit pro Ruhanit, e 21 nga konservatorët. Pjesa tjetër u fitua nga të pavarurit.
Kjo do të thotë se reformistët do të kenë 128 vende në parlamentin e ri me 290 deputetë, katër më shumë se konservatorët, diçka që ndodh për herë të parë që nga viti 2004.
Por se nga do të anojë balanca do të përcaktohet nga të pavarurit. Rezultati në favor të reformistëve dhe të moderuarve mund të hapë rrugën për ndryshime si në aspektin social dhe në atë kulturor.
Reformistët kanë inkurajuar investimet e huaja, si dhe kërkojnë më pak kufizime politike.
Në kryeqytet nuk pati votime të premten, pasi Lista e Shpresës i pati fituar në raundin e parë të 30 vendet. /tesheshi.com/
