Në Abu Dhabi, Emiratet, Shqipëria dhe Italia u bashkuan në një aleancë strategjike për energjinë e rinovueshme, duke nënshkruar një marrëveshje investimi për lidhjen nënujore të rrjetit të shpërndarjes së energjisë me Italinë në detin Adriatik, si edhe për investimet në rritjen e prodhimit nga burimet e rinovueshme në Shqipëri.
Kryeministri Rama tha se kjo marrëveshje e bën Shqipërinë një lojtar kyç në rajon në tregun energjitik dhe për këtë vlerësoi lart shtetin e pasur të Gjirit, Emiratet.
“Partneriteti i Shqipërisë me Emiratet e Bashkuara Arabe në sektorin energjetik është shumë, shumë i rëndësishëm për rajonin, një rajon ku shumë luftëra, konflikte, gjakderdhje, keqkuptime i kanë dhënë formë të shkuarës sonë dhe ku bashkëpunimi dhe dëshira e përbashkët për të qenë pjesë e familjes së madhe europiane duhet mbështetur me nisma dhe hapa konkrete për të kapërcyer të shkuarën”, shtoi Rama.
Nga ana tjetër, kryeministrja Meloni tha se “Italia është e lidhur në mënyrë tradicionale me Ballkanin Perëndimor siç tregon dhe miqësia ime me Ramën”.
“Jam jashtë mase e gëzuar, ashtu siç e shpalli edhe Edi më parë që të nënshkruajmë kuadrin e partneritetit strategjik për të nisur një projekt po aq ambicioz midis dy brigjeve të Adriatikut”, theksoi Meloni.
Sipas Melonit, “kjo nismë është një hap konkret drejt një ndërlidhje mirëfilli globale nga Azia në Gji, nga Afrika në Evropë, e aftë për të furnizuar me energji në mënyrë të dyanshme”.
“Jetojmë në një epokë komplekse shënjuar nga transformimin të forta, tashmë kemi një zgjedhje për të bërë ose mund të vuajmë nga këto transformime duke qëndruar pa bërë asgjë ose mund t’i interpretojmë ato si mundësi, besoj fort se duhet të zgjedhim të dytën dhe ta ndjekim me kurajo dhe vizion pa asnjë frikë”, tha Meloni. /tesheshi.com/
