Aleanca për Mbrojtjen e Teatrit ka patur një komunikim me Sekretarin e përgjithshëm të OSBE, Thomas Greminger, ardhur në Tiranë për aktin e kalimit të presidencës së kësaj organizate nën drejtimin e Shqipërisë.
Ata i kërkojnë zyrtarit të lartë një takim, duke marrë më pas një përgjigje prej tij.
“Nuk e ekzagjerojmë aspak kur themi se qeverisemi nga dekretet dhe çdo vendimmarrje, sado e rëndë mund të jetë, është e lejueshme, për sa kohë që qeveria e aprovon. Z. Sekretar i Përgjithshëm, Komuniteti ndërkombëtar i ka kushtuar shuma të mëdha monetare dhe burime njerëzore për të ndërtuar një demokraci funksionale, shtet ligjor, ndarje të pushteteve dhe balancave në Shqipëri. Asnjë nga këto nuk ekziston në këtë moment dhe Ekzekutivi, i kontrolluar personalisht nga kryeministri Rama, është totalisht i shfrenuar, ashtu siç tregon edhe çështja e Teatrit Kombëtar. Ne besojmë se do ishte një gabim fatal, gabim i cili do dëmtonte besimin e publikut shqiptar ndaj institucioneve ndërkombëtare, nëse një gjendje e tillë do lejohet të vazhdojë.
Në takimin tonë ne do donim të diskutonim një rrugëzgjidhje të mundshme për krizën dhe si rikthimi i shtetit ligjor do të ndihmonte Teatrin Kombëtar si dhe të gjithë vendin. Çdo informacion tjetër teknik që ju mund t’ju duket i nevojshëm lidhur me çështjen, mund t’ju vihet në dispozicion. Ne jemi në pritje të një takimi nga ju dhe Prania në Shqipëri e OSBE”, thuhet ndër të tjera në letrën e grupimit që refuzon prishjen e godinës së vjetër të TK-së.
Thomas Greminger iu është përgjigjur, sigurisht me një gjuhë paksa të drunjtë diplomatike.
“Të nderuar Aleanca për Mbrojtjen e Teatrit,
Kam marrë me kënaqësi ftesën tuaj, pasi ajo tregon konsideratë për Organizatën që unë përfaqësoj. Megjithatë, për fat të keq, për shkak të një vizite të shkurtër dhe një axhende të ngushtë, nuk isha në gjendje ti u përgjigjesha pozitivisht.
Duke pasur parasysh zhvillimin e djeshëm, përkatësisht Presidentin e Republikës, duke paraqitur kërkesë në Gjykatën Kushtetuese në lidhje me ligjin e posaçëm për ndërtimin e ndërtesës së re të Teatrit Kombëtar, të gjitha palët duhet të presin vendimin e Gjykatës së Lartë para se të vazhdojnë më tutje kjo çështje”, shprehet zyrtari i lartë i OSBE-së. /tesheshi.com/
