Përfundimisht, lideri i Aleancës për Shqiptarët, Ziadin Sela, i ka thënë “lamtumirë” kreut të qeverisë maqedonas, Zoran Zaev, duke u tërhequr përfundimisht nga koalicioni qeverisës.
Funksionarët e Aleancës për Shqiptarët depozituan dorëheqjet në qeveri, akt qe vjen tre ditë pas thirrjes së Selës. Shkak u bë mosdhënia sërish e Ministrisë së Shëndetësisë, dikaster që u drejtuar nga sekretari gjeneral i Aleancës, Arben Taravari, para se të marrë postin e kryetarit të Komunës së Gostivarit.
Ilmi Aziri nga Aleanca për Shqiptarët, bëri të ditur largimet.
“Ne jemi tre zëvendësministra, një sekretar shtetëror dhe diku rreth tetë drejtorë. Pra bëhet fjalë për 12-13 funksione të cilat i ka pasur ASH nëpër institucione. Mbi bazë të marrëveshjeve që i ka bërë Ziadin Sela me partnerët e koalicionit, pozicioni ministër i Pushtetit Lokal i ka takuar ASH-së, megjithatë opinioni i di rrjedhat politike dhe partiake të cilat kanë ndodhur deri tani dhe ai ministër është i Vesel Memedit” – tha Ilmi Aziri.
Përveç zv/ministrave, dorëheqje depozituan edhe drejtorët e kësaj partie të cilët ishin në inspektorate dhe agjenci shtetërore. Drejtori i Byrosë për zhvillimin e Arsimit, Rizvan Bela tha se gjatë 5 muajve derisa ka qenë drejtor ka treguar rezultat, porse ja që nuk ka arritur deri në fund të realizojë planet të cilat i kishte paraparë.
“Para pak çastesh depozitova dorëheqjen time nga posti i drejtorit të Byrosë për Zhvillimin e Arsimit. Ky ishte qëndrim partiak dhe mendoj që duhej që ta respektojmë. Ne dëshmuam se kemi dinjitet dhe se nuk jemi me çdo kusht në qeveri”, tha Rizvan Bela, nga APSH.
Nga ana e tij, kryeministri Zoran Zaev shprehu keqardhje për ikjen e Aleancës nga qeveria, por tha se mbetet me shpresë që kjo forcë politike do t’i përkrahë në proceset reformuese.
Si për ironi, Aleanca për Shqiptarët ishte ndër subjektet e para që i siguroi nënshkrimet Zaevit si mandatar për formimin e qeverisë.
Tashmë pritet të shihet se cili do jetë pozicioni i partisë së Selës në opozitë, nëse do të bashkohet me Lëvizjen BESA. Po ashtu, edhe lloji i opozitës që do të bëjë, pasi dihet që BDI-në e Ali Ahmetit e ka “halë në sy”. /tesheshi.com/
