Ditën e enjte, më 22 shtator, Kuvendi ka parashikuar votimin në seancë të projektligjit për importimin e mbetjeve.
Pas debateve dhe mosmarrëveshjeve, duket se tashmë PS dhe PD janë dakordësuar për votimin e ligjit që do t’i hap rrugën importimit të mbetjeve nga jashtë dhe kjo u pa qartë gjatë diskutimit të nismës në Komisionin e Veprimtarive Prodhuese. Me ndërhyrjet dhe teknikalitetet që i janë bërë ligjit në raport me vitin 2013, kur pati reagime të shumta kundër tij, këtë herë janë shuar edhe zërat kundër, jo vetëm të ambeintalistëve por edhe të shoqërisë civile në vend. Gjithsesi, do të jetë Aleanca Kundër Importit të Plehrave, e cila duke filluar që nga dita e hënë do të zhvillojë protesta kundër ligjit që pritet të miratohet në Parlament.
Me anë të një njoftimi në rrjetet sociale, aleanca njofton të gjithë qytetarët që t’i bashkohen tubimit të datës 19 shtator. “Kjo mund të ishte një lagje Shqiptare. Por nuk është, faktikisht është një lagje Rumune! Para disa vitesh qeveria Rumune vendosi të importonte plehrat e Evropës dhe shikoni si ka përfunduar! Në 19 dhe 22 shtator në tubim kundër plehrave!”, thuhet në njoftimin e Aleancës Kundër Importit të Plehrave, i cili shoqërohet edhe me një foto ilustruese, një grumbull plehrash. Në fakt një pjesë e vogël e shoqërisë civile vazhdimisht kanë deklaruar se do të kundërshtojnë ashpër nismën si me protesta ashtu edhe me kërkesën për zhvillimin e një peticioni në lidhje me zhvillimin e referendumit, i cili u anulua në vitin 2013, kur PS erdhi në pushtet. Ndërkohë, sipas Eduard Shalsit, një ndër iniciatorët e rikthimit të projektligjit që lejon importimin e mbetjeve, tashmë Shqipëria i ka kushtet për një hap të tillë.
“Në 2013 Shqipëria kishte nevojë për një masë drastike sepse na duhej të investigonim shqetësimin që të huajt kishin vazhdimisht dhe e publikonin në mediat e tyre: çfarë hynte në Shqipëri? A kishte siguri në dogana? Sot janë pjekur kushtet që të lejohet futja e lëndës së parë sekondare, që do të bëjë të mundur mbijetesën e këtyre kompanive”, thotë Shalsi.
Deri tani nismat e deputetëve socialistë gjithmonë kanë marrë miratimin e maxhorancës dhe e njëjta gjë pritet të ndodhë edhe me nismën e fundit.
/tesheshi.com/
