Nga Blendi Gashi
Deputetja e VV-së, Albulena Haxhiu e cila është në arrest shtëpiak në një prononcim për portalin mbarëkombëtar tesheshi.com ka thënë se personalisht mendon se edhe kolegët e tjerë opozitarë që kanë masën e njëjtë duhet të jenë në protestë, por thotë se për këtë do të marrë vendim sot gjatë ditës opozita e bashkuar.
“Pra ata (opozita e bashkuar) bashkërisht do ta vlerësojnë nëse duhet apo jo të marrim pjesë në protestë”, ka deklaruar ajo.
E pyetur për deklaratën e zëvendëskryeministrit Hashim Thaçi se opozita po fton qytetarët në protesta të dhunshme, Haxhiu deklaratat e tilla i quan dëshpëruese, duke thënë se Thaçi është në panik dhe së bashku me kryeministrin Mustafa duhet të japin dorëheqje.
“I njëjti në vend të tentimit për t’i frikêsuar qytetarët do të duhej tê jepte llogari, për nënshkrimin në faljen e territorit Malit të Zi por edhe për dështimin e anëtarësimit ne UNESCO, dështimin në liberalizimin e vizave e të tjera.
Thaçi është në panik. E ka humbur toruan sepse fare nuk brengoset për problemet me të cilat po ballafaqohen qytetarët dhe rrezikun që po i kanoset Republikës, por e ka mendjen vetëm se si të bëhet President por vet ambiciet e sëmura të tij për tu bërë President janë fatkeqësi për vendin e lëre më të bëhet! Ky së bashku me Isa Mustafën do të duhej që të japin dorëheqje dhe të dy bashkë e kanë vendin në burg jo vetëm për dosjet e korrupsionit por edhe për tradhëtinë ndaj vendit që penalizohet me Kodin Penal”, thotë deputetja Haxhiu për tesheshi.com.
Duke folur për veprimet e opozitës në Kuvendin e Republikës së Kosovës, ajo ka thënë se opozitarët i kanë bërë me ndërgjegje të lartë politike dhe përbrenda fushveprimtarisë së tyre si deputetë.
Sistemi i drejtësisë i kapur
Deputetja Haxhiu veprimet e organeve të drejtësisë për të arrestuar dhe burgosur opozitarët i quan veprime politike.
“Sistemi i kapur i drejtësisë me këto veprime po bëhet gardian i pushtetit jokushtetues të Mustafës. I gjithë ky persekutimi politik nisi në seancën e 17 nëntorit kur Mustafa dhe Thaçi bënin thirrje për arrestimin e deputetëve të opozitës. Është e dhimbshme se si 16 vite të pasluftës, arrestohen ata që me çdo kusht po e mbrojnë Republiken dhe territorin dhe jo ata pushtetarë që u pasuruan në kurriz të qytetarëve të varfër”, thotë ajo.
Deputetja e VV-së vendimin për vazhdimin e masës aë arrestit shtëpiak e quan të padrejtë, politik dhe jokushtetues ashtu siç ka qenë ky proces që nga fillimi.
“Duke e marr parasysh faktin që në krye të institucioneve të vendit janë njerëz që veprojnë me metodat e Millosheviqit dhe ato të stilit putinian natyrisht që mund të arrestohemi e burgosemi sërish por kjo nuk na frikëson dhe as nuk do të na ndalë. Ky rrugëtimi jonë kërkon sakrifica dhe është koha e fundit që të dalim në mbrotje të atdheut pavarësisht çmimit”, thotë ajo.
/tesheshi.com/
