Nuk ka pasur marrëveshje të fshehta, ka pasur takime me KFOR-in, EULEX-in dhe ambasadorët e Quinti-t, veçanërisht me ambasadorin e SHBA, tha kryeministri i Kosovës Albin Kurti, lidhur me akuzat e opozitës kosovare se barrikadat në veriun e Kosovës u hoqën pas “marrëveshjes së fshehtë” me Serbinë.
Në një intervistë për agjencinë Kosovapress, Kurti ka theksuar se garancia e vetme që iu është dhënë përfaqësuesve ndërkombëtarë ishte se nuk kishte listë arrestimi për serbët.
Ai ka hedhur poshtë kategorikisht akuzat se është dhënë garanci për formimin e Bashkësisë së Komunave me shumicë serbe në Kosovë.
Kryeministri tha se Qeveria e Kosovës i ka dhënë hapësirë dhe kohë KFOR-it për heqjen e barrikadave, pasi kjo nuk mund të zgjaste pafundësisht dhe se Policia e Kosovës do t’i largonte vetë. Por në takime është vërejtur se KFOR vërtet ishte e angazhuar në drejtim të heqjes së barrikadave.
“Ne i dhamë më shumë kohë KFOR-it sepse nga informacionet që morëm ishte e qartë se persona të cilët ose ishin të përfshirë drejtpërdrejt ose kishin lidhje me mercenarët e Wagner-it, pastaj me formacionin paramilitar ‘Ujqërit e Natës’, përdornin taktika që u ngjanin atyre të vitit 2014 në Ukrainë kur Operacioni Maskirovka u përdor në një mënyrë për të arritur në territorin e palës së kundërt, pastaj në Ukrainë dhe tani këtu në veri të Kosovës”, theksoi Kurti.
Ai shtoi se për shkak të gjithë kësaj ka pasur një vigjilencë të dyfishtë, dhe barrikadat nuk ishin aq kundër qeverisë së Kosovës, sa ishin barrikada kundër pluralizmit politik në komunitetin serb në Kosovë.
“Ishin barrikada më shumë kundër Nenad Rashiçit dhe Rada Trajkoviçit se sa kundër Albin Kurtit”, tha Kurti, duke theksuar se beson se i njëjti motiv për të mbytur pluralizmin politik në mesin e serbëve të Kosovës çoi në vrasjen e Oliver Ivanoviçit gati pesë vjet më parë.
“Për ne është e papranueshme që një pjesë e territorit tonë të kontrollohet nga Serbia”, tha Kurti.
Lidhur me transferimin e të pandehurit Dejan Pantiç nga burgu në arrest shtëpiak, Kurti tha se mendonte se për shkak të gjendjes së keqe shëndetësore dhe grevës së urisë, Pantiç do të transferohej në spital për trajtim, e jo në arrest shtëpiak, duke qenë se i pandehuri ishte nën akuzë për terrorizëm.
Ai ka shtuar se gjyqësori është i pavarur nga qeveria e Kosovës.
Kryeministri u bëri thirrje edhe një herë të gjithë qytetarëve të Serbisë, veçanërisht atyre që më parë nuk kanë pasur mundësi të punësohen, që të aplikojnë për konkurset e punës në institucionet e Kosovës. Ai tha se nuk dëshiron që pozitat e lëna bosh nga largimi i qindra serbëve nga institucionet e Kosovës të plotësohen me punësim të shqiptarëve.
Ai po ashtu bëri të ditur se vitin e ardhshëm do të ndahet një buxhet prej disa milionë eurosh për të gjitha kompanitë që do të kenë strukturë multietnike të të punësuarve. /tesheshi.com/
