Ushtruesi i detyrës së kryeministrit të Kosovës, Albin Kurti tha se qeveria që ai kryeson është përballur me shumë sfida, por që, përkundër kësaj, ai do të vazhdojë të punojë për të mirën e qytetarëve deri në zgjedhjet e ardhshme.
Ai kujtoi në Twitter se dy ditë më parë, ishin shënuar 100 ditë punë e Qeverisë së Kosovës.
“Megjithë krizën shëndetësore, krizën ekonomike dhe krizën e panevojshme politike, ne ishim të pandalshëm. Në 100 ditë, ne morëm 200 vendime për lirimin e shtetit të kapur, luftimin e virusit të koronës”, tha Kurti, duke shtuar se qeveria kishte ndërmarrë masa të hershme për të parandaluar përhapjen.
“Falë ndërhyrjes së hershme, punonjësve shëndetësorë, policisë dhe qytetarëve tanë, kemi më pak vdekje, më pak raste aktive dhe Kosova është një histori suksesi kur bëhet fjalë për menaxhimin e masave kundër përhapjes së koronavirusit.”
Kursyer miliona euro
Kurti tha në Twitter se qeveria ka filluar një proces verifikimi për gjyqtarët, prokurorët dhe zyrtarët e lartë për të sjellë profesionalizëm, paanshmëri dhe besim në sistemin e drejtësisë.
“Ne rindërtuam bordet e ndërmarrjeve publike, shkarkuam drejtuesit që morën afër 100,000 euro në vit për pagat dhe shpërblimet, pavarësisht se operuan me humbje, përveç që kërkuan subvencione shtetërore. Ata gjithashtu nënshkruan kontrata të dëmshme dhe punësuan njerëz përmes nepotizmit”, shkroi ai.
Ai kujtoi se qeveria kishte kursyer miliona euro duke anuluar kontratat e lobimit, të krijuara për të pasuruar individë dhe bashkëpunëtorë të fuqishëm.
“Ne i shfrytëzuam kursimet për të ndihmuar punonjësit tanë shëndetësorë dhe më të prekurit. Ne zvogëluam shpenzimet jofunksionale të qeverisë dhe bëmë kursime vjetore prej 1.4 milion euro. Ne ulëm, dhe në disa raste, përgjysmë, pagat e punonjësve të qeverisë. Në këtë shoqëri, 30 përqind e njerëzve jetojnë në varfëri, dhe 30 përqind janë të papunë. Me këtë ulje, ne kemi kursyer 1.1 milion euro në vit “, ka shkruar Kurti në Twitter. /tesheshi.com/
