Deputeti më i votuar në Kosovë, kandidati për kryeministër nga Vetëvendosje, Albin Kurti, ka përkujtuar heroin Enver Zymberi në gjashtë vjetorin e rënies.
Ai ka thënë se kryeministri i atëhershëm, Hashim Thaçi, që nisi aksionin në veri edhe e ndërpreu atë, e braktisi çështjen Zymberi, duke u dorëzuar përballë kriminelëve e duke mos i gjetur fajtorët.
“Gjashtë vite më parë, në 25 korrik 2011, u vra në krye të detyrës polici i Kosovës, Enver Zymberi. Enver Zymberi ishte pjesëtar i forcave speciale. Ai u vra në një aksion që synonte vendosjen e sundimit të ligjit në veri të vendit tonë. Rrethanat e vrasjes së Enver Zymberit, si dhe autori apo autorët e vrasjes së tij, edhe sot ende nuk dihen.
Enver Zymberi nuk është viktimë. Ai është dëshmor i Republikës sonë. Organizata kriminale që e vrau atë është përgjegjëse për pengmarrjen e veriut të vendit. Ne sot e përkujtojmë me respekt Enver Zymberin, të vendosur që ta çojmë përpara gjyqit vrasësin e tij, të vendosur që të mos lejojmë një qeverisje të Kosovës që bën aleancë me strukturat politike përgjegjëse për atë vrasje”, ka shkruar Kurti në Facebook./tesheshi.com/
