Kreu i Vetëvendosjes, Albin Kurti ka reaguar pas miratimit të marrëveshjes së Demarkacionit me Malin e Zi, duke thënë se së pari do të duhej të bëhej korrigjimi i marrëveshjes dhe më pas miratimi i saj.
Ai thotë se deputetë iu bashkuan tradhtisë së presidentit Thaçi, shkeljes së Kushtetutës dhe integritetit territorial të Kosovës, e po ashtu dhe dhunës policore mbi deputetët.
“Shumica dërrmuese e Vetëvendosjes ose u arrestuan ose u përjashtuan padrejtësisht. Njëherësh është dashur të bëhej korrigjimi e më pas miratimi i marrëveshjes së demarkacionit. Është dashur që Qeveria të rifillojë bisedimet me Malin e Zi. Kollçaku është përjashtuar pa qenë fare në një prej rasteve në Kuvend. Kjo është tejet e paskrupullt. Veseli është njeriu më i gabuar për të udhëhequr një institucion të shtetit tonë”, deklaroi Kurti.
Kurse Fatmire Kollçaku ka thënë se këto janë prova se nuk jemi popull shtetformues.
“Ne kërkuam vetëm shikim, korrigjim, e më pas ratifikim. Këto janë prova se nuk jemi popull shtetformues”, tha ajo.
Marrëveshja e Demarkacionit me Malin e Zi u miratua me 80 vota pro e 11 kundër. /tesheshi.com/
