Takimin trepalësh të liderëve të Ballkanit Perëndimor në Ohër, kryetari i Lëvizjes Vetëvendosje e quan të nxituar. Sipas tij, Shqipëria zyrtare është dashur të presë të formohet qeveria e re e Kosovës, e jo të nxitohet me takime në Novi Sad e Ohër.
Madje, për kandidatin për kryeministër të Kosovës, projekte të tilla Shqipëria duhet të nisë me Kosovën dhe jo me Serbinë.
“Një lloj vrapi në Novi Sad dhe në Shkup, është gabim në hapa. Nuk nis me Serbinë kjo punë. Nis Kosovë-Shqipëri, vazhdon Kroaci-Bullgari, vazhdon Sarajevë zyrtare, Podgoricë zyrtare, Shkup zyrtar e Beogradi në fund.
Shqipëria zyrtare u ankua se nuk ka pasur qeveri të denjë në Kosovë për bashkëpunim si e ka dashur. Meqenëse e paska pritur Shqipëria zyrtare një qeveri të denjë të Kosovës, ka mundur të pres edhe pak javë që të formohet kjo qeveri, e të bashkëpunojmë siç duam të gjithë. Nëse kanë pritur shumë vite është dashur të presin edhe pak javë”, u shpreh Kurti. /tesheshi.com/
