Si politikani më i pakënaqur për mënyrën si ka rrjedhur dialogu Kosovë-Serbi, kandidati për kryeministër nga Vetëvendosje, Albin Kurti ka parlajmëruar se nëse do të marrë në dorë frenat e qeverisjes, do të rishikojë marrëveshjet e Brukselit arritur me Beogradin, ose ato që pritet të arrihen, duke formuar për këtë edhe një komision parlamentar.
Megjithatë, ai është shprehur në parim se dialogu është i nevojshëm dhe se nuk është kundër pajtimit.
Këto qëndrime, Kurti i ka shpalosur në një intervistë për numrin më të ri të javores “Vranjske”, i cili do të dalë në shitje të enjten.
“Vetëvendosje propozon një lloj dialogu të hapur dhe demokratik, social me pakica, përfshirë edhe serbët e Kosovës. Për ne do të ketë përparësi dialogu me serbët nga Kosova”, ka thënë Kurti.
Ai ka shtuar se Vetëvendosje ka një plan për komunat veriore në Kosovë dhe për serbët nga Kosova, i cili parasheh masa të kombinuara ekonomike dhe sociale, si dhe nuk beson se integrimi i serbëve është i mundur pa zhvillimin ekonomik të Kosovës.
Kurti ka folur edhe për takimin e mundshëm me kryeminsitrin serb Aleksandër Vuçiç. Për këtë të fundit është shprehur se i kthen kujtimet e ditëve studentore, kur organizonte protesta kundër regjimit të Sllobodan Millosheviçit. Në atë kohë, Vuçiç, si ministër për informacione ka mbajtur konferenca për media para hotelit “Grand” në Prishtinë, ku ishin vendosur paramilitarët e Arkanit.
“Është e mundshme që ai në Bruksel të duket ndryshe, por jo edhe nga Prishtina. Vuçiç dhe Daçiç janë pasues të Millosheviçit dhe Sheshelit. Nuk shoh kurrfarë dallimi në objektivat e tyre. Shoh vetëm dallim në strategji dhe metodë, pasi që rrethanat janë tjera”, ka thënë Kurti.
Sipas tij, Vuçiç nuk mërzitet për serbët, por ai mendon vetëm për pushtetin e vet. /tesheshi.com/
