Konventa Ndërkombëtare e Socialistëve që u mbajt dje në Tel Aviv të Izraelit shërbeu edhe si dhomë lobimi për vënien në tavolinë çështjen e njohjes së Kosovës nga Izraeli dhe Palestina.
Kryetari i Lëvizjes Vetëvendosje, Albin Kurti, po qëndron në Lindje të Mesme, ku po kryen vizita në kuadër të tubimeve ndërkombëtare të partive socialiste.
Ai iu bashkua liderëve të tjerë të lëvizjeve majtiste nga e gjithë bota, pa dashur ta humbë mundësinë që aty të përmendet edhe Kosova.
“Të dy vendet nuk na njohin, dhe kjo është e përbashkëta e tyre. Do të ishtë më mirë që të bëheshin bashkë në njohjen e Kosovës”, tha në një moment Kurti.
“Nga Angola dhe Mali te Franca dhe Belgjika, nga Brazili dhe Paraguaji te Meksika, nga Italia dhe Greqia te Filipinet, nga Palestina te Izraeli, patëm bashkëbisedime të hapura, impresive dhe të vlefshme”, shtoi ai.
Por Kurti bëri edhe një “vlerësim” që as BE-ja nuk ka guxim ta japë, pavarësisht se mund ta ndjejë.
“Izraeli është shumë shtet, është më shumë se shtet. Palestina është pak shtet, është më pak se shtet. Kërkesa për zgjidhjen me dy shtete është shprehje e kërkesës për barazi”, ka thënë Kurti.
Aty nuk mbeti pa u prekur edhe populizmi, armë kjo e pikëpamjeve të majta, ku Kurti tha se jo çdokush mund të quhet populist, dhe se ky favor po u shkon shpesh edhe atyre me tendenca raciste. /tesheshi.com/
