Në një fjalim në Konferencën e Mynihut, i pari prezantim ndërkombëtar i Albin Kurtit si kryeministër i Kosovës, ai përcolli një deklaratë tipike për ligjërimin e tij politik, teksa iu drejtuar faktorit ndërkombëtar duke i thënë.
“Pothuajse të gjithë prej jush na ndihmuat që 20 vjet më parë Kosova të çlirohet nga Serbia. Tani mendoj e ka ardhur koha që të ndihmohet Serbia për t’u çliruar nga Kosova. Pra, pas çlirimit të Kosovës nga Serbia, duhet të bëhet çlirimi i Serbisë nga Kosova”.
Aty, Kurti shpalosi dhe tre kushtet për rinisjen e dialogut me Beogradin, duke thënë:
“Gjëja e fundit, por edhe më e rëndësishmja, ne duhet të jemi të gatshëm për dialogun e ardhshëm mes Kosovës dhe Serbisë.
Duhet t’i kemi parasysh tri parime për t’i shëruar plagët e planit të dështuar. Duhet ta përgatisim mirë, me parime të mira dialogun e ardhshëm në rajonin tonë, në veçanti atë ndërmjet Kosovës dhe Serbisë. 1) s’ka marrëveshje pa dialog, 2) s’ka dialog me harta, dhe 3) pa presidentë rreth hartave”.
Kurti përmendi dhe çështjen e Schengenit rajonal, duke thënë se ende e ka të paqartë. E nga ana tjetër, ofroi idenë e një Plani Marshall për rajonin.
“Kjo ideja e Mini-Shengenit nuk është shumë e qartë për mua, nuk kam parë shumë dokumente, është një ide e paprojektuar për implementim. Besoj se duhet të hyjë në procesin e Berlinit, kështu do të ishte më së miri, kur të gjashta shtetet janë në tavolinë. Njëjtë sikurse Plani Marshall, që u hartua nga Shtetet e Bashkuara të Amerikës pas Luftës së Dytë Botërore, tani neve na duhet një Mini-Marshall Plan për shtetet e Ballkanit Perëndimor”, theksoi shefi i qeverisë së Kosovës. /tesheshi.com/
