Duke prezantuar punën 100-ditore të qeverisjes së tij, edhe pse i rrëzuar me mocion mosbesimi, kryeministi në detyrë Albin Kurti tha se ai do vijojë ta qeverisë Kosovën deri në zgjedhje të reja.
“Në këto 100, çkapja e shtetit nga mujsharët ka filluar dhe nuk do të ndalet. Ka edhe parti që po kërkojnë zgjedhje. Qeveria do të mbetet në detyrë deri në zgjedhjet e reja”, tha Kurti, duke shtuar se “qeveria u rrëzua por një popull i tërë u ngrit. Jam i mbushur me shpresë më shumë se kurrë. Ajo që më jep shpresë është shpirti i qytetarëve të zgjuar. Besimi që kanë në vetën e tyre dhe qeverinë e tyre”.
Sipas tij, paçka shumë pengesave të natyrës politike, edhe epidemike gjithashtu, qeveria e tij arriti ta tregojë veten.
“Për këto 100 ditë kemi marrë gati 200 vendime, por kemi pasë 100 pengesa. Pandemia, presidenti i frustruar dhe që sfidonte punën e qeverisë dhe një opozitë që u angazhua ta rrëzojë qeverinë. Pandemia e ka konsumuar energjinë e Qeverisë dhe timen si kryeministër. As 10 përqind e energjisë nuk janë përqendruar nga sulmet e vazhdueshme. Ky është standard i ri”, deklaroi Kurti.
Ai theksoi se krejt tjetër e kishte parashikuar 100-ditëshin.
“Janë bërë 100 ditë të qeverisë, këtë duhet ta shohim në dy rrafshe; dy 50 ditësha, ku kishim një parlament funksional dhe në të dytën nuk e kishim. Iniciativat ligjore janë bërë të pamundura dhe së dyti duhet ta shohim në pikëpamjen e kohës ku 90 përqind e energjisë ka shkuar në luftimin e pandemisë. Paramendoni sikur të kishim 100% kohë”, theksoi njeriu në krye të qeverisë së Kosovës. /tesheshi.com/
