Kryeministri i Kosovës Albin Kurti tha se nuk mund të ketë marrëveshje me Serbinë nëse qasja e saj është se “duhet të fitojë” diçka.
Duke komentuar mesazhin e Presidentit serb Aleksandër Vuçiç se Serbia gjithashtu duhet të marrë diçka në kthim nga Kosova, Kurti tha se kjo nuk mund të jetë pika fillestare për zgjidhjen e problemeve.
“Ne nuk jemi këtu për të kompensuar orekset, por për të shëruar plagët. Me këtë qasje, unë nuk shoh që ne mund të gjejmë një zgjidhje, por së bashku me vendet perëndimore mund të krijojmë një kontekst në të cilin mund të gjendet një zgjidhje”, tha Kurti në intervistën e tij në RTK.
Ai shtoi se “Serbia ka pranuar që nuk e ka pasur kurrë Kosovën, dhe se e humbi atë gjatë regjimit të Millosheviçit”.
Ky ishte qëndrimi i parë i Kurtit ndaj Beogradit si kryeministër i Kosovës, shpalosur pak orë pas marrjes së detyrës së lartë udhëheqëse. /tesheshi.com/
.
