Vetëvendosje po mundohet të mbush boshllëkun pas largimit të disa prej figurave kyçe të partisë. Krue i saj Albin Kurti ka zyrtarizuar së fundi një prurje të re. Bëhet fjalë për Driton Hysenin, menaxher i planifikimit të fluturimeve në Aeroportin Ndërkombëtar të Prishtinës.
Kurti ka thënë fjalë të mira për Hysenin duke theksuar se është i dëshmuar në luftë e në paqe, dhe me angazhimin e tij VV i është shtuar dije dhe energji.
“Para dy dekadash kemi punuar bashkë në Zyrën e UÇK-së në Prishtinë. Sot na u bashkua në Vetëvendosje, Driton Hyseni, inxhinier i kompjuterikës, magjistër në drejtimin e biznesit ndërkombëtar dhe ekspert në fushën e aviacionit civil. Dritoni është i dëshmuar në luftë e në paqe, i përgatitur politikisht e profesionalisht. Punëve e angazhimeve tona, sidomos në Llap e në Prishtinë, iu shtua dije dhe energji”, shkruan Kurti në Facebook.
Pavarësisht kësaj prurjeje, Kurti ka punë të madhe për të bindur figura të ndryshme që t’i bashkohen vetëvendosësve dhe ngadalë të ringjallë partinë pas goditjes që mori me largimin e emrave të njohur si Shpend Ahmeti, Visar Ymeri, Dardan Molliqaj etj. /tesheshi.com/
