Kryeministri i Kosovës Albin Kurti ka bërë të ditur se ka propozuar pesë pika për të de-përshkallëzuar situatën në veri të Kosovës dhe se për të reduktuar prezencën e njësive speciale të Policisë së Kosovës, fillimisht është e nevojshme tërheqja e menjëhershme e grupeve kriminale nga komunat veriore.
Kurti, në konferencën për media, tha se planin e ka prezantuar sot paradite para ambasadorëve të vendeve të Quint-it, ndërsa dje për këtë ka biseduar në telefon me përfaqësuesin e lartë të Bashkimit Evropian, Josep Borella dhe të dërguarin special të BE-së për dialog, Miroslav Lajçak. Për propozimin e tij ai dje ka njoftuar edhe ambasadorin amerikan Jeff Hovenier.
Kurti tha se përshkallëzimi në veri të Kosovës është pasojë e bojkotit të zgjedhjeve të jashtëzakonshme lokale të Serbisë në prill në katër komunat veriore, për shkak të presionit të Beogradit ndaj serbëve vendorë që t’i bojkotojnë zgjedhjet.
Në propozimin e tij prej pesë pikash me hapa konkretë për të dalë nga situata, Kurti kërkon që së pari të zbatohet sundimi i ligjit në veri, në kuptimin e identifikimit të grupeve kriminale që çuan në dhunë dhe së dyti, që grupet kriminale të hiqen menjëherë nga veriu.
Së treti, që Policia e Kosovës dhe KFOR-i apo EULEX-i të kryejnë vlerësime të përbashkëta të sigurisë çdo 15 ditë për të garantuar një mjedis të sigurt, së katërti që Qeveria e Kosovës, në koordinim me të gjithë aktorët, të thërrasë për zgjedhje të parakohshme në katër komuna në veri, dhe së pesti që Prishtina dhe Beogradi të kthehen në dialog me ndërmjetësimin e BE-së.
“Siç tregon kronologjia e zhvillimit të ngjarjeve, që nga 5 nëntori i vitit të kaluar, vendimet tona as nuk kanë kontribuar në përshkallëzimin dhe as nuk janë burim i përshkallëzimit të situatës në veri të Kosovës. Ne jemi të detyruar të zbatojmë dispozitat dhe ligjet kushtetuese në tërë territorin e Republikës së Kosovës”, theksoi Kurti.
Ai ka theksuar se Kosova dhe Serbia kanë rënë dakord për një marrëveshje bazë nga Brukseli dhe Ohri nga shkurti dhe marsi i këtij viti, e cila duhet të zbatohet.
Ai po ashtu tha se dhuna më e madhe ka ndodhur më 29 maj në Zveçan, kur kryetari i ri i komunës nuk ishte në ndërtesën e komunës, me grupe kriminale nga të cilat thërret ‘vritni, vritni’”, tha Kurti, sipas së cilit, “në Kosovë nuk ka dhunë kur nuk ka urdhra nga Beogradi”.
Kurti tha se grupet kriminale po vijnë nga Serbia për të destabilizuar Kosovën dhe se ata që sulmuan gazetarët dhe ushtarët e KFOR-it duhet të mbajnë përgjegjësi.
I pyetur për të komentuar propozimin për draft-statutin e Bashkësisë së Komunave me shumicë serbe, të cilin kryeministri shqiptar Edi Rama e ka dorëzuar në Bruksel, Kurti tha se adresa për atë model për pakicat kombëtare duhet të jetë në Beograd.
“Nuk ka dyshim se kryeministri Rama beson se ky është modeli i duhur, model i mirë, por është dashur t’ia jep presidentit të Serbisë si propozim për shqiptarët në Preshevë, Medvegjë dhe Bujanoc, aq më tepër që neni 8 në pikën 1 të Kushtetutës së Republikës së Shqipërisë thuhet se Republika e Shqipërisë mbron të drejtat kombëtare të popullit shqiptar që jeton jashtë kufijve të saj”, theksoi Kurti.
Sa i përket sanksioneve të partnerëve strategjikë ndaj Kosovës, Kurti tha se masat e marra nuk janë të drejta. Ai ka shtuar se i dëgjon këshillat, por se Qeveria e Kosovës i merr vendimet e vetme sepse mban përgjegjësi. /tesheshi.com/
