Në kulmin e një mosmarrëveshjeje me LDK-në për ndarjen e re të pushtetit të dalë nga vota e 6 tetorit, kryeministri në pritje Albin Kurti i ka kushtuar një dedikim të gjatë, në llojin e një biografie, themeluesit të kësaj force, ish-presidentit Rugova.
Edhe pse kurrë nuk i është referuar shpesh në politikëbërje, Kurti ka shfrytëzuar 14-vjetorin e ikjes nga jeta të Rugovës, për ta ripërshkruar atë, në stilin e tij, e këtë duke e nisur me aspektin intelektual, atë që është harruar disi ndaj të ndjerit.
Dr. Ibrahim Rugova ka qenë kritik letrar i kalimit nga strukturalizimi te post-strukturalizmi francez gjatë viteve ‘70, intelektual i angazhuar e humanist që ka evituar konfliktet, njeri racional i pasionuar me gjuhën si histori dhe si institut, dhe, shqiptar i urtë që e don popullin e vet ashtu siç ai është.
Historiani britanik Noel Malcolm ka theksuar se Presidenti Ibrahim Rugova, në njërën anë, i ka bashkuar shqiptarët e Kosovës kundër Serbisë, ndërkaq, në anën tjetër, e ka ndërkombëtarizuar çështjen e Kosovës”, shkruan Kurti.
Më pas, ai sjellë në kujtesë protagonizimin e të ndjerit në mediat e Perëndimit, e ku bie në sy një detaj pak i njohur: qasja ndaj kahjes radikale, ndërkohë që vetë ai njihej për zgjidhje paqësore
“‘Në këtë situatë është normale që të ketë edhe individë e grupe më radikale në këtë lëvizje të madhe të rezistencës paqësore, por në këtë situatë është vështirë që edhe radikalët të bëjnë diçka. Dallimet që kemi – rezistencë paqësore apo rezistencë e armatosur – i shoh jo si konfrontim, ashtu siç po dëshiron Serbia t’i paraqesë, por si shenjë e frymës demokratike e tolerante, ndonëse nën okupim.’ – Ibrahim Rugova ‘Qëndrojmë në opcionin tonë për Kosovën e pavarur e neutrale’, intervistuar nga Ruzhdi Demiri, Bujku, 6 nëntor 1992, faqe 3”, shkruan Kurti. /tesheshi.com/
