Kryevetëvendosësi Albin Kurti vazhdon të mospajtohet që presidenti Thaçi të jetë kryenegociator i dialogut me Serbinë, pasi e sheh një figurë që do t’i bëjë dëme vendit e favore kundërshtarit.
“Në një mënyrë presidenti po e shtynë Kosovën tek formula e Serbisë, më pak se pavarësi më shumë se autonomi, siç ka dashur Beogradi. Po i ndihmon Serbisë të arrijë sa më shpejt në Bashkimin Evropian. Nuk është e rastësishme që u tërhoq platforma që erdhi në Kuvend se e dinin se nuk do merrte as minimumin e votave. Ne jemi të interesuar për dialog me parime dhe jo për persona pa parime që hyjnë në dialog për interesa vetjake. Nuk duam të legjitimojmë këto sjellje. Mund të bëj ujdi të fshehtë por nuk do i vlejnë në Kosovë. Çfarë do marrëveshje që do nënshkruaj Thaçi për dialogun në Bruksel nuk do vlejë as sa çmimi i ngjyrës dhe i letrës që do nënshkruhet”, ka deklaruar Kurti në një konferencë për media.
Ai ka folur edhe për çështjen e rishikimit të vijës kufitare me Malin e Zi, me ç’rast ka kritikuar qeverinë “Haraidnaj” duke thënë se që nga ratifikimi i Demarkacionit e deri më tash nuk është bërë asnjë lëvizje në këtë drejtim.
“Tre muaj të ratifikimit të demarkacionit me Malin e Zi dhe nuk ka asnjë lëvizje me atë se çfarë ka thënë kryeministri në Kuvend sa i përket rishikimit. E ka heshtur këtë çështje dhe nuk po lëviz asgjë në këtë drejtim. Nuk po i parashtrohen Malit të Zi asnjë kërkesë. Jo pak deputetë u patën mashtruar pikërisht nga premtimi i korrigjimit që nuk po ndodh”, ka deklaruar Kurti.
Ai tutje ka dekaruar se kryeministri Haradinaj duhet të jap dorëheqje sepse udhëheq një qeveri që nuk e ka shumicën dhe në këtë drejtim opozita sipas tij duhet të bëjë trysni dhe të koordinohet që të ngrisin mocion mosbesimi. /tesheshi.com/
