Një vit më parë Albin Kurti e kritikonte ashpër Isa Mustafën për keqqeverisje dhe fyenin rëndë njëri-tjetrin, por sot gjërat kanë ndryshuar aq shumë sa që po takohen bashkë me qëllim të mposhtin dyshen Veseli dhe Haradinaj.
Kurti, që është kandidat i VV-së për kryeministër ka bërë të ditur se ka zhvilluar një takim me Mustafën dhe tjetri pritet të ndodhë në momentin që kreu i LDK-së të kthehet nga Trieste.
Kurti ka zbuluar edhe takimet që ka pasur me ambasadorin amerikan në Kosovë.
“Kemi pasur vetëm një takim. Është dashur të kemi shumë më shumë takime. Jemi ku jemi, kemi zhvilluar një takim dhe porsa të kthehet kryeministri në detyrë, Isa Mustafa ne do të zhvillojmë takim e radhës”, ka thënë Kurti, në një intervistë për mediat shqiptare.
Ai ka shtuar se me Mustafën do të bisedojnë në dy rrafshe.
“Bisedimet duhet të jenë në dy rrafshe. Rrafshi i par është politik ku do të diskutohen temat nacionale, si ushtria, gjykata special, Demarkacioni, Dialogu me Serbinë, Asociacionin etj, dhe rrafshi i dytë do të jetë plani qeverisës”, ka thënë Kurti.
Më tutje, ai ka treguar se ka pasur takime me të gjithë ambasadorët e vendeve të huaja në Kosovë, madje edhe me atë të Amerikës.
“Unë kisha vite që nuk takohesha me ambasadorin amerikan në Kosovë kurse tani jam takuar së fundmi. Edhe në takimet tona në Evropë që kishim së bashku me Visar Ymerin dhe Shpend Ahmetin, askush nuk na ka thënë se Vetëvendosje nuk duhet të qeverisë me vendin”, ka thënë Kurti, por që nuk ka treguar çfarë ka biseduar me ambasadorët. /tesheshi.com/
