Kandidati i Lëvizjes Vetëvendosje për kryeministër, Albin Kurti ka folur për prioritetet kryesore të punës së tij nëse fiton zgjedhjet e tetorit, përfshirë korrupsionin, dialogun me Serbinë dhe çështjen e simboleve kombëtare.
Kurti nis “vagonin e problemeve” me zhdukjen e korrupsionit, duke thënë se në bazë të një studimi ndërkombëtar, dhjetë për qind e familjeve në Kosovë japin ryshfete në shërbimet publike, të cilat do të duhej të ishin të garantuara.
Kjo përqindje, sipas tij, është shumë më e lartë në Mal të Zi, 34 për qind, që do të thotë, se korrupsioni në Kosovë është i përqendruar te institucionet dhe jo te qytetarët.
“Unë besoj që më kollaj luftohet korrupsionin në Kosovë sesa në Serbi e në Mal të Zi. Korrupsioni në Kosovë nuk është kulturë, por është sistem, dhe duhet ta godasim në majat e sistemit, atje ku ai ka çerdhen e tij. Nuk mendoj se është e pamundur. Përkundrazi, mendoj se një lëvizje e jona që e çliron gjyqësorin nga ekzekutivi, do të dëshmojë që suksesi, jo vetëm që është i mundur, por është edhe më i shpejtë sa ç’është menduar”.
Sondazhet flasin për rritje të përkrahjes për partinë VV, ndërsa kjo e fundit ka përjashtuar mundësinë e koalicionit parazgjedhor me cilëndo parti tjetër që hyn në garën e 6 tetorit. Megjithatë, partia nuk “i ka rënë vijë” koalicionit paszgjedhor me LDK-në, e cila poashtu shihet si pretendente për afro 30% të votave, gjithnjë duke u bazuar në sondazhe. /tesheshi.com/
