Kryeministri Albin Kurti tha se Shtetet e Bashkuara të Amerikës dhe Bashkimi Evropian janë të njëanshme në bisedimet ndërmjet Kosovës dhe Serbisë, duke pretenduar se Gabriel Escobar dhe Miroslav Lajçak po vijnë me kërkesat e palës tjetër.
“Na vijnë me kërkesa. Me kërkesat e palës tjetër”, tha Kurti rër Associated Press, duke shtuar se kabineti i tij i trajton autoritetet në Serbi si një “regjim autokratik”.
Ai pohon se prania e forcave speciale të policisë nuk mund të zvogëlohet derisa “bandat kriminale serbe ose të largohen nga vendi ose të arrestohen”, duke shtuar se në Kosovë do të ketë paqe nëse nuk ka “urdhra për dhunë nga Beogradi”.
Kurti thotë gjithashtu se fuqitë perëndimore nuk duhet t’i nënshtrohen Beogradit, në të cilin ai sheh, siç thotë ai, “problemin thelbësor për dhunën në Ballkanin Perëndimor”.
Ai tha se edhe për zgjedhjet e veçanta në katër komunat veriore me shumicë serbe të 23 prillit, Kosova dështoi nga ndërmjetësit ndërkombëtarë, pasi siç tha ai, ata i kanë bërë thirrje Kosovës që të bëjë ndryshime zgjedhore, por nuk kanë bërë presion për partinë e vetme politike të serbëve etnikë që merr pjesë në votim.
Për këtë arsye ai thotë se do t’i duhet ndihma e bashkësisë ndërkombëtare për të nxitur pluralizmin politik në pakicën etnike serbe, në mënyrë që të sigurohet “konkurrencë e ndershme dhe një garë demokratike për kryetarët e rinj”.
“Nuk mund t’i lejojmë vetes një proces tjetër që do të bojkotohet nga kandidatët serbë disa ditë para fillimit të zgjedhjeve, sepse Beogradi po e urdhëron”, tha Kurti. /tesheshi.com/
