Deputeti i Vetëvendosje-s, Albin Kurti është shfaqur në media pas një kohe të gjatë ku përballë ka pasur dy gazetarët e njohur kosovarw, Baton Haxhiu dhe Adriatik Kelmendi.
Kurti, në emisionin Debat në RTK, ka folur për krizën aktuale politike në vend, zgjedhjen e presidentit, protestat e opozitës dhe zgjedhjet e parakohshme.
Ish-kreu i VV-së ka thënë se Hashim Thaçi mund të bëhet president në tavan ku rrinë minjtë e në Gërmi gjarpërinjtë, por jo në sallën e seancave në Kuvendin e Kosovës
Duke folur për protestat e opozitës, ai tha se ato nuk kanë të bëjnë me dëshirën për pushtet dhe se kundërshtimi brenda Kuvendit me gaz lotsjellës do të vazhdojë…
“Opozita ka gaz lotësjellës dhe bëjnë mirë që nuk i thirrin seancat. Gazi lotsjellës është aksion politik e jo dhunë. Ne, derisa të funksionon gazi lotsjellës, tjetër gjë nuk përdorim. Unë nuk kam hyrë në Kuvend me lën protestën pas dere”, ka deklaruar Kurti.
Gazetari Baton Haxhiu ka thënë se përplasja politike e ka fillin nga koha e bllokut VLAN, duke aluduar në atë se opozita ka edhe një lloj inati ndaj Mustafës për shkak se i tradhëtoi dhe u bashkua me PDK-në.
Por Kurti ka mohuar një gjë të tillë duke thënë se opozita nuk hedhi gaz lotësjellës pse u formua qeveria PDK-LDK, SRPSKA, por për shkak të formimit të “Zajednicës”.
“Unë nuk kam urrejtje ndaj Isa Mustafës, por s’kam edhe aq respekt. Dy muaj na thoshin ejani të bëjmë marrëveshje verbale. Ata që thonë nuk bëjmë marrëveshje me shkrim, e kanë ndërmend ta shkelin atë. Nuk e konsiderojmë ne këtë si lider, si burrështetas aq të madh që ta urrejmë. Fare nuk është kjo situatë. Tha që pa u ba liberalizimi i vizave nuk shkoj në Bruksel. Vuçiç ta njeh Mustafën, ma mirë se LDK-ja”, tha Kurti.
“Rruga e Mustafës dhe e Thaçit e çon Ballkanin në luftë”
Ish-kreu i VV-së, tha se nëse Kosova vazhdon rrugëtimin e saj me hapat e Mustafës e Thaçit, gjasat janë që brenda 4 apo 5 vjetësh në Ballkan të ketë luftë.
“Nëse vazhdojmë në këtë rrugë, të Thaçit e Mustafës, Vuçiqit e Dodikut, brenda 4-5 vjetësh gjasat janë më shumë që të ketë luftë në Ballkan.
Temë tjetër e prekur në këtë debat ishte edhe çështja e Asociacionit dhe Demarkacionit.
Gazetari Baton Haxhiu i tha Kurtit se edhe opozita kur të vijë në pushtet është e detyruar të bëj tw njwjtin veprim nëse këto tema vijnë në tavolinë.
Por Kurti u kundërpërgjigj duke thënë se “nëse ne e vazhdojmë “Zajednicën”, e meritojmë dhe ne gazin lotsjellës”.
Ndërsa gazetari Adriatik Kelmendi kërkoi nga Kurti të tregojë nëse opozita e bashkuar do të shkojë në zgjedhje me listë të përbashkët, por ish-kreu i VV-së nuk dha përgjigje duke thënë se ajo duhet treguar vetëm pasi të shpallen zgjedhjet. Përgatiti: Blendi Gashi – /tesheshi.com/
