Dy vetëvendosësit Albin Kurti e Donika Kadaj-Bujupi kanë fituar betejën pasi janë liruar nga paraburgimi për t’u mbrojtur në liri edhe pse prokurori i rastit Daradan Gashi kërkoi dënimin e tyre.
Megjithatë ata do kthehen sërish në gjykatë më 3 janar ku do shpallet aktgjykimi ku përfundimisht do mësohet nëse do shpallen të pafajshëm apo jo lidhur me gazin lotsjellës në Kuvend.
Para se të merrej vendimi, Kurti në fjalën e tij përfundimtare para trupit gjykues tha se vepra për të cilën akuzohen, nuk përbënë vepër penale pasi tha se janë vënë në mbrojtje të Republikës ashtu siç e thotë edhe ligji.
“Se veprimi ynë është në pajtim me kushtetutën, këtë e tregoj edhe vendimi i Gjykatës Kushtetuese. Ne kemi mbrojte kushtetutshmërinë e vendit por edhe veten tonë. Veprimi ynë është edhe akt i vetëmbrojtjes”, ka thënë Kurti.
Sipas tij nga përdorimi i gazit lotsjellës në Kuvend askush nuk është alivanosur në sallë.
Kurti ndër të tjera ka thënë se eksepritiza ka treguar se nuk posedojnë mjete adekuate për matjen e rrezikshmërisë së ajrit, prandaj nuk është vërtetuar prania e mbetjeve kimike.
“Gjyqtari Beqir Kalludra ka qenë shumë më i ashpër ndaj neve të akuzuarve se sa vetë prokurori”, ka thënë Kurti.
Lajmin për lirimin e dy vetëvendosësve i është gëzuar kreu i Prishtinës, Shpend Ahmeti, i cili ka kërkuar të lirohen edhe aktivistët e dënuar.
“Albini e Donika janë mbajtur maksimalisht në paraburgim, dhe ky vendim është shumë shumë i vonuar. Proceset gjyqësore ndaj aktivistëve nuk po ndalen.
Mirëpo në duhet të këmbëngulim! Padrejtësitë duhet të ndalen. Deputetët që mbrojtën Republikën duhet të lirohen nga aktakuzat. Adea, Frashëri, Atdheu e Egzoni duhet të lirohen nga dënimet pa kurrfarë faktesh”, shkruan Ahmeti në Facebook. /tesheshi.com/
