Një përgjigje nga Uashingtoni se nuk ka asnjë “marrëveshje të fshehtë” për ndarjen e Kosovës, e ka detyruar kryeministrin e rrëzuar por ende në detyrë, Albin Kurtin, që të reagojë i kënaqur nga ky fakt, edhe pse pretendon të kundërtën.
“Është tejet i rëndësishëm fakti se në Deklaratën e Përbashkët thuhet se nuk ekziston një plan i fshehtë për ripërcaktim kufijsh dhe se i dërguari i posaçëm presidencial, Richard Grenell, nuk e ka parë dhe as diskutuar një plan të tillë.
Kjo paraqet një mbështetje dhe inkurajim për qeverinë në detyrë. Por, për ne thirrjet e vazhdueshme të Presidentëve Thaçi dhe Vuçiq (korrigjim kufijsh me kompromis të dhimbshëm, veriu si dhuratë e Rankoviqit, razgraničenje, etj.) vazhdojnë të jenë kërcënim, dhe që nga gushti i vitit 2018, ato janë përsëritur nga dy presidentët të cilët kanë vendosur lidhje të shkurtër me njëri-tjetrin pa ndërmjetësim ndërkombëtar”, thuhet në një deklaratë të qeverisë së Kosovës në detyrë.
E nën këtë frymë, Kurti edhe njëherë ka këmbënëglur se Thaçi e jo ai duhet të udhëheqë dialogun me Serbinë.
“Dialogu në mes të Kosovës dhe Serbisë duhet të udhëhiqet nga qeveria, përkatësisht Kryeministri i Republikës së Kosovës, sipas parimeve kushtetuese të Republikës së Kosovës. Dialogu duhet të rifillojë i përgatitur mirë, të ketë qëllim njohjen e ndërsjelltë si dy shtete sovrane dhe me integritet territorial, për marrëveshje të qëndrueshme si garant për normalizim të marrëdhënieve bilaterale dhe paqe e siguri në rajon”, thuhet në deklaratë. /tesheshi.com/
