Kuvendi i Kosovës ka nisur dhe përfunduar një tjetër seancë të jashtëzakonshme me kërkesën e partive politike opozitare për të debatuar lidhur me “Parimet programore të qeverisë së re”, seancë që u bojkotua nga kabineti qeveritar dhe deputetët e partitive politike në pushtet.
Dy partitë opozitare, Vetëvendosje dhe LDK, qeverinë “Haradinaj” e kanë cilësuar si më të dobtën nga paslufta duke thënë se do punojnë çdo ditë ta rrëzojnë atë, ndërsa kanë paralajmëruar që të mos sjellin tema të mëdha në Kuvend, si Demarkacioni, Asociacioni etj.
Që në seancën e parë deputeti i Lëvizjes Vetëvendosje, Albin Kurti, ka kritikuar qeverinë për dhënien e Ministrisë së Bujqësisë, Listës Serbe.
“Me këtë që kanë bërë, i kanë dhënë mundësi të mirë Serbisë t’i realizojë planet e saj, që t’i fuqizojë projektet për kolonizim e ndarje të brendshme të Kosovës projektet për bosnjëzimin e Kosovës. Në derexhenë ku e kanë prurë Kosovën përmes kushtëzimeve që i kanë vendosur në Kushtetutë e ligje të tjera, Kosova gjithnjë e më shumë tash me këtë qeveri po e humbet pavarësinë e po shkon drejt autonomisë”, tha Kurti.
Ai ka paralajmëruar qeverinë që mos të sjellë në Kuvendin e Kosovës, siç ka thënë ai, tema e ligje të rëndësishme, pasi, sipas tij, nuk do të kalojnë.
“Ju e keni një qeveri të dobët, partia juaj dhe kryeministri i ka vetëm 10 deputetë kështu që mos shkoni me këmbët tuaja te gracka e Vuçiqit mos provoni ta sillni në këtë Kuvend ‘Zajednicën’ e Serbisë, demarkacionin me Malin e Zi, Kosovën C, me 23 për qind profit për privatin, sepse ne do t’ju ndalim”, theksoi Kurti.
Kurse Avdullah Hoti, shef i grupit parlamentar të LDK-së ka thënë se qeveria e Kosovës u formua në bazë të pazareve politike dhe sipas tij vendi po hyn në një krizë të thellë politike.
“Është e pafalshme që të kthehet ndikimi i plotë i Beogradit në Qeverinë e Kosovës, kur ende kemi rreth 1600 të pagjetur nga lufta e vitit 1998-‘99. Qytetarët e Kosovës nuk do t’i falin këta njerëz që thirren si çlirimtarë, e thirren në heroizma ndërkohë që arrijnë pazare të tilla me Beogradin. Kjo është ditë fatkeqe për vendin tonë të shtrenjtë. Në krye të Qeverisë është personi, partia e të cilit ia ka futur flakën Kuvendit të Kosovës me gaz lotsjellës dhe dhunë”, tha Hoti.
Në seancën, e cila zgjati më pak se një orë, pjesëmarrës nga koalicioni PAN dhe AKR-ja ishte vetëm kryetari i Kuvendit, Kadri Veseli, dhe deputeti i partisë NISMA-s, Milaim Zeka. /tesheshi.com/
