Albin Kurti, deputet i Lëvizjes Vetëvendosje ka ngacmuar jo pak PDK-LDK-në duke thënë se ato kanë humbur shumë në zgjedhjet parlamentare të 11 qershorit sa që nuk po mund të kthjellen..
“Më 11 qershor ka ndodhur një lloj tërmeti politik në Kosovë që ka shkaktuar traumë te LDK e PDK, e nuk janë këndellur më dhe gjithnjë më shumë kanë bashkëpunuar. Janë bërë bashkë për të luftuar Vetëvendosjen. Nga këto zgjedhje lokale po dalim me një organizatë më të fuqishme”, ka thënë Kurti për radio Urban FM.
Kurti e ka quajtur 2017-ën “viti i Vetëvendosjes” duke iu referuar fitores në dy qytetet më të mëdha, Prishtinën e Prizrenin.
“Është e vërtetë që unë kam qëndruar në tjera komuna për shkak të zgjedhjeve të fundit. është evidente se do të kthehem tani në Prishtinë. Duhet të ulemi brenda dhe t’i bëjmë analizat e arritjes në këto zgjedhje, por mendoj se me këto dy fitore (Prizren dhe Prishtinë), viti 2017 është i Vetëvendosjes”, ka deklaruar ai.
Kurti ka thënë se numri i asambleistëve të VV-së nëpër komuna ka shënuar rritje në këto zgjedhje. /tesheshi.com/
