Bernie Sanders, pretendenti për t’i përfaqësuar demokratët në zgjedhjet presidenciale amerikane, ka fituar në Alaska dhe Uashington karshi rivales Hillary Clinton.
Fitore të thella për Sanders-in, si në Alaskë dhe në Uashington, përkatësisht me 79 e 72 për qind të votave të fituara karshi Clinton-it, ish-sekretares amerikane të Shtetit.
Ende nuk janë bërë të njohura rezultatet në Havai, por edhe atje shenjat janë për një fitore të Bernie Sanders-it.
“E dinim se gjërat do të përmirësoheshin teksa iu drejtuam perëndimit. Ne kemi një rrugë drejt fitores,” u tha senatori i Vermontit mbështetësve në Medison.
Pavarësisht fitoreve të Sanders-it, Hillary Clinton është ende shumë përpara për nga numri i delegatëve. Ajo udhëhiqte gjer në votimet e së shtunës me 1.223 delegatë në krah të saj karshi 920 delegatëve të rivalit Sanders. Duke shtuar edhe mbështetjen e superdelegatëve, të cilët janë të lirë të mbështesin çdo kandidat, Clinton ka 1.692 delegatë, ndërsa Bernie Sanders ka vetëm 949 të tillë. Ndërkohë që një kandidati demokrat i duhen 2.383 delegatë për të fituar nominimin.
Sanders do të shkruante në rrjetin social Twitter: “Faleminderit Alaska! Së bashku po dërgojmë një mesazh se kjo qeveri na përket të gjithëve ne… Uashington, faleminderit për mbështetjen e madhe…”
Clinton, nga ana e saj, ka bërë më pak fushatë në tre shtetet që votuan të shtunën, duke qenë ndoshta e vetëdijshme se do të humbiste. /tesheshi.com/
