Pas alarmit të lëshuar nga disa shkrime tesheshi.com ku është folur me fakte dhe shqetësim për shpopullimin e Krajës, një prej trevave më të rëndësishme shqiptare në Mal të Zi, po rritet gjithnjë e më shumë shqetësimi i banorëve të zonës për të mos ndaluar asgjësimin total.
Hajrullah Koliqi, një nga intelektualët e spikatur shqiptarë të Malit të Zi, në një shkrim të botuar në të vetmen periodike politike shoqërore të shqiptarëve, “Koha Javore”, ngre zërin se nuk bëhet fjalë për një shpopullim por për një asgjësim total të Krajës.
“Kraja, kjo trevë paradoksesh, për shumëçka unike. Në Krajë ujë ka (Liqeni), ujë s’ka (Kraja e thatë); shtet ka (Mali i Zi), shtet s’ka (kur duhet t’i dalë në ndihmë këtij populli); premtohen investime (në kohë fushatash), investime s’ka (as për be); shqiptarë ka (flasin shqip), shqiptarë s’ka (frikësohen nga Shqipja); demokraci ka (me fjalë), demokraci s’ka (në realitet); Krajën e duan (të serbizuar), Krajën s’e duan ashtu siç është (shqiptare); në Krajë fshatra ka (toponime), fshatarë nuk ka, sidomos në Anën e Sipërme, e cila përfundimisht ka “vdekur”, vendi ka mbetur ‘vashi’”, thekson Prof.Dr Hajrullah Koliqi, i cili ka lindur në Krajë, por për shumë vite ka qenë pedagog në Universitetet e Prishtinës dhe Tetovës.
Në shkrimin e tij që është një thirrje e fuqishme, profesor Koliqi sjell fakte edhe më tronditëse.
“Mbishkrimet në varrezat katolike ka kohë që janë shkruar dhe shkruhen në gjuhën dhe alfabetin serb. Ka shestanas (fshat në Krajë, shën. red) që nuk janë të kënaqur me faktin se arqipshkvi i Arqipeshkvisë së Tivarit është shqiptar dhe e mban meshën në gjuhën shqipe.
Po, si ka mundësi që 70 për qind e votuesve të Anës së Poshtme (në zgjedhjet e shkuara) të votojnë për parti melazeze ose serbe?! Çdo respekt për parti të kombeve të tjerë, por këta votues kranjanë të tjetërsuar, a e pyesin veten ndonjëherë se sa është përqindja e votuesve malazezë apo serbë që kanë votuar për parti shqiptare?! Përgjigjja është shumë e qartë: Asnjë! Si ka mundësi, gjithashtu, që vetëm në Krajë, si askund tjetër në botën shqiptare, të mos kremtohet DITA E FLAMURIT, siç ndodhi në vitin 2015?”.
Koliqi, në shkrimin e tij, pasi vë në dukje se vendi po braktiset dhe është braktisur gjithnjë e më shumë, ku vetëm Anën e Poshtme të saj e kanë braktisur rreth 4000 qytetarë dhe ka mbetur me pak më shumë se 1000 banorë rezidentë, fëmijë, të rinj, të rritur, të moshuar, burra, gra, thotë se shumë prej tyre shpëtimin përpiqen ta gjejnë jashtë Krajës.
Por ajo që sjell më shumë frikë është hyrja e Kishës Ortodokse serbe dhe ringjallja e heronjve sllavë që kanë masakruar shqiptarët.
“Në vorbullën e këtyre çudirave po ngjizet propozimi që një rrugë në Krajë të pagëzohet me emrin “Taraboshski Junaci”, për të madhëruar ushtarët dhe oficerët e Krajl Nikollës, të cilët donin ta “çlironin Shkodrën”, por që lanë eshtrat në istikamet e saj. Në Krajën e braktisur e me njerëz të tjetërsuar nuk është çudi që në maje të Kraliçit (Kështenjë) shpejt të marrë shtat një Kryq i Kishës Ortodokse Serbe.
Nuk është aspak çudi që edhe në Arbnesh të ngrihet një përmendore për “jurishnikët” e Krajl Nikollës, më 1912, të cilët e paguan me kokë marrinë e tyre nëpër Krajë dhe në Tarabosh. Në këto rrethana, duket se nuk ka mbetur rrugë tjetër, vetëm t’i lutemi Zotit dhe kranjanëve të vdekur (se të gjallët janë ligështuar shumë) që ta shpëtojnë Krajën nga ky shpërfytyrim!”, përfundon alarmin e tij profesor Hajrullah Koliqi. /tesheshi.com/
