Për shkak të aktiviteteve njerëzore, niveli i përqendrimit të dioksidit të karbonit (CO2), përgjegjës për ngrohjen globale, në atmosferë do të jetë 50 për qind më i lartë se para revolucionit industrial dhe kështu do të kalojë pragun simbolik të ndryshimit të klimës, njoftoi Zyra Meteorologjike Britanike.
Viti 2021 konsiderohet vendimtar për zbatimin e Marrëveshjes së Parisit 2015 për të shmangur ndryshimin katastrofik të klimës dhe shkencëtarët parashikojnë se këto parashikime nxjerrin në pah nevojën për veprim urgjent për të ulur emetimet e CO2 nga djegia e qymyrit, naftës dhe gazit natyror.
“Sasia e CO2 në atmosferë, e krijuar nga aktiviteti njerëzor, po rritet. U deshën 200 vjet që këto sasi të rriteshin me 25 përqind, dhe tani po i afrohemi një rritjeje prej 50 përqind në 30 vitet e fundit,” tha Richard Betts, një klimatolog në Zyrën Meteorologjike.
Kulmi vjetor
Emetimet nga djegia e lëndëve djegëse fosile dhe shpyllëzimi do të çojnë në akumulimin e vazhdueshëm të CO2 në atmosferë këtë vit dhe për herë të parë, përqendrimet pritet të jenë mbi 417 njësi për milion (ppm) gjatë disa javësh nga prilli deri në qershor.
Këto nivele rekord do të jenë 50 për qind më të larta se në fillim të epokës industriale në fund të shekullit të 18 kur ishin 278 ppm, shtoi Zyra Meteorologjike Britanike.
Kulmi vjetor do të pasohet nga një rënie ciklike kur bimët në hemisferën veriore fillojnë të thithin CO2. Nga shtatori, nivelet e dioksidit të karbonit do të vazhdojnë të rriten dhe sasia mesatare e gazit që çon në efektin serë do të jetë rreth 416.3, shtojnë ekspertët britanikë.
Përqendrimet e CO2 prej kohësh janë mbi nivelet që ekspertët e klimës i konsiderojnë të sigurta. Në samitin e klimës në Madrid në 2019, Sekretari i Përgjithshëm i KB Antonio Guterres paralajmëroi se sasia prej 400 ppm konsiderohej dikur një “kulm i paimagjinueshëm”. /tesheshi.com/
