Nga Blendi Gashi
Pjesëtarët e ish-strukturave ilegale të Serbisë vazhdojnë të marrin nga dy paga. Edhe pse nuk punojnë në llogari të shtetit të Kosovës ata paguhen duke qëndruar në shtëpi, derisa dhe një rrogë tjetër e marrin nga shteti serb pasi Beogradi zyrtarisht nuk i ka larguar ilegalët nga lista e pagave.
Ata janë futur në sistemin e pagave prej janarit të këtij viti, por prej 483 pjesëtarëve të Mbrojtjes Civile, vetëm disa prej tyre mësohet sejanë duke kryer punë të përditshme në Doganën e Kosovës, në Agjencinë e Veterinës dhe Ushqimit dhe në Administratën Tatimore.
Ekspertët e sigurisë thonë se është e pafalshme që në papunësinë në të cilën gjendet vendi, njerëz apo grupe të caktuara që punojnë kundër interesave të shtetit të marrin paga pa punuar, derisa një pjesë dërmuese e kosovarëve përballen me varfëri të skajshme.
Për më tepër njohësit e sigurisë një gjë të tillë e konsiderojnë sulm direkt ndaj sigurisë nacionale në vend.
Naim Maloku, ekspert i çështjeve të sigurisë thotë se është e palogjikshme që në këtë varfëri dhe papunësi të paguhen njerëz që nuk punojne.
“Si duket marrëveshja nga dialogu me Serbinë në Bruksel ka degraduar në masë të madhe në dëm të Kosovës. Përgjegjësinë për këtë e mbanë qeveria e Kosovës”, thotë Maloku, për tesheshi.com.
Edhe deputetja e Lëvizjes Vetëvendosje, Donika Kadaj-Bujupi thotë se paratë që ndahen për pjesëtarë të strukturave paralele sebe të cilët nuk punojnë fare për të mirën e shtetit tonë, më e drejtë do të ishte të ndahen për të varfërit.
“E para strukturat paralele është dashur të shpërbëhen. E dyta pagesat për strukturat paralele nga buxheti i shtetit tone është fuqizim i Serbisë në Kosovë, dhe e treta këto mjete në vend se të shfrytëzohen për përkrahje të kategorive të varfëra shfrytëzohen për të paguar kriminel”, thotë Kadaj-Bujupi, përtesheshi.com.
Por, Drizan Shala, njohës i çështjeve të sigurisë thotë se problemi qëndron në atë që strukturat ilegale (legale për atë pjesë ) do të qëndrojnë edhe për një kohë relativisht të gjatë aktive dhe që problemi qëndron më shumë në aspektin politik se të sigurisë.
“Qeveria ka zgjedhur rrugën e vetme që të mbaj nën kontroll veriun që është një risk i lartë por për kohën dhe hapësirën në të cilën gjendet Kosova mendoj që është alternativa e vetme që ta vazhdojë që t’i risocializoj me parime e procedura që ata të kuptojnë që kjo nuk do të tolerohet edhe gjatë nga organet qeveritare.
Mendoj që Agjencia Kosova e Intelegjencës (AKI) është duke përcjell gjendjen e këtyre strukturave dhe këtyre personave e derisa këta janë nën kontroll është mirë që të punojë në dy drejtime atë të kontrollit dhe shtrrjerjes në atë pjesë dhe në anen tjetër të hartojë planin që në vitin 2018 të kemi eleminim zyrtar të këtyre struktutave”, Shala, për tesheshi.com.
Kurse, njohësi tjetër i çështjeve të sigurisë, Burim Ramadani, vazhdimin e pagesave nga Serbia për pjesëtarët që janë integruar në institucionet e sigurisë së Kosovës e quan sulm direkt ndaj sigurisë nacionale të Kosovës.
“Marrëveshjet në Bruksel për akomodimin e strukturave paralele nuk mund të zbatohet në këtë mënyrë dhe nuk duhet të minohen nga Serbia. Institucionet e shtetit të Kosovës duhet të jenë tepër të vëmendshme në këtë aspekt, sepse kjo është qartë jo vetëm shkelje e ligjit, por është rrezikim i sigurisë nacionale”, ka thënë Ramadani, për tesheshi.com.
Ndryshe, drejtues të qeverisë së Kosovës në deklarata e dhëna për mediat dhënien e pagës për pjesëtarët e “Mbrojtjes Civile” e kanë arsyetuar me qëllimin që këta pjesëtarë t’i shkëpusin prej Serbisë dhe për shkak se atyre nuk u është krijuar ende hapësira për punë.
/tesheshi.com/
